عامې روغتیا وزارت: د ژمي له پیله تر اوسه ۲۴ کسانو د ګازنیونې له امله خپل ژوند له لاسه ورکړی

کابل (پژواک، ۲۲ مرغومې ۱۴۰۳): د عامې روغتیا وزارت وایي، سږ کال د ژمي له پیل تر اوسه روغتیایي مرکزونو ته ۸۹۴ کسان د ګازنیونې له امله وروړل شوي چې ۲۴ تنو یې خپل ژوند له لاسه ورکړی دی.

د عامې روغتیا وزارت ویاند ډاکټر شرافت زمان وایي، سږ کال د ژمي له پیله تر اوسه روغتیایي مرکزونو ته ۸۹۴ کسان د ګازنیونې یا کاربن مونواکاسایډ تسمم له امله وروړل شوي چې ۲۴ تنو یې خپل ژوند له لاسه ورکړی.

هغه لیکلي په مړه شوو کسانو کې ۱۵ نارینه او نهه ښځې شاملې دي.

نوموړي له خلکو غوښتي چې د ګازي بخاریو د کارونې پر مهال له احتیاط څخه کار واخلي.

دا په داسې حال کې ده چې تېره ورځ په سمنګان ولایت کې د یوې کورنۍ اته غړي مسموم شوي وو.