<p style="text-align: justify;">کابل (پژواک، ۲۲ مرغومی ۱۴۰۳): نیکولاس مادورو په داسې حال کې د درېیم ځل لپاره د ونزویلا د ولسمشر په توګه خپله دنده پيل کړه چې متحده ایالاتو د هغه د نیولو جایزه له ۱۵ څخه ۲۵ میلیون ډالرو ته لوړه کړې ده.</p>
<p style="text-align: justify;">د <strong><a href="https://www.reuters.com/world/americas/venezuelas-maduro-be-sworn-third-term-opposition-leader-vows-return-2025-01-10/">رویټرز</a> </strong>د راپور له مخې، مادورو چې د ولسمشرۍ نږدې ۱۲ کاله یې له ژور اقتصادي او ټولنیزو ناورینونو سره تېر شول، د ونزویلا د ولسمشر په توګه د لوړې مراسم ترسره کړل.</p>
<p style="text-align: justify;">دا مراسم په داسې حال کې ترسره شول چې د امریکا ولسمشر جو بایډن د تېر میلادي کال په ټاکنو کې د مادورو بریالي کېدل په رسميت نه پېژني او اعلان یې کړی چې دا ټاکنې غیرقانوني دي.</p>
<p style="text-align: justify;">د رویټرز د راپور له مخې، د بایډن دولت د مادورو د نیولو لپاره ټاکل شوې جایزه له ۱۵ میلیونو څخه ۲۵ میلیون ډالرو ته لوړه کړې ده. یاده جایزه د مادورو پر ضد د مخدره توکو د قاچاق او فساد په تور ټاکل شوې ده.</p>
<p style="text-align: justify;">د امریکا د بهرنیو چارو وزیر انتوني بلینکن پر خپلې بیانیه کې ټینګار کړی چې د مادورو د لوړې مراسم غیرقانوني وو او متحده ایالات به هغه د ونزویلا د ولسمشر په توګه په رسمیت ونه پېژني.</p>
<p style="text-align: justify;">ورته مهال، د ونزویلا د ټاکنو کمېسیون او عالي دیوان له شپږ میاشتو اختلاف وروسته مادورو د ټاکنو ګټونکی اعلان کړ خو د رایو شمېر او نور جزییات یې په رسمي ډول نه دي خپاره شوي.</p>
