Language

Don't you have an account with Pajhwok Afghan News?

Click here to subscribe.

د کډوالو وزارت سرپرست د ملګرو ملتونو عالي کمېشنرۍ له مرستیال سره وکتل

کابل (پژواک، ۳۰ مرغومی ۱۴۰۳): د کډوالو او راستنېدونکو چارو وزارت سرپرست مولوي عبدالکبیر د ملګرو ملتونو عالي کمېشنرۍ له مرستیال سره په لیدنه کې ویلي چې هېواد ته د کډوالو راستنول یې لومړیتوب دی، خو د یادې کمېشنرۍ مرستیال ویلي، هڅه کوي د کډوالو ستونزو ته د رسېدنې لپاره د اړتیا وړ بودجه راجلب کړي.

د کډوالو او راستنېدونکو چارو وزارت نن پر خپله اېکس‌پاڼه لیکلي، د کډوالو لپاره د ملګرو ملتونو عالي کمېشنرۍ مرستیال رووف مازو او ورسره مل پلاوي د دغه وزارت له سرپرست وزیر مولوي عبدالکبیر سره وکتل.

سرچینې لیکلي، په دې ناسته کې د افغان کډوالو پر وضعیت، د کډوالۍ پر دایمي حللارو، د کډوالو ښارګوټو ته د اسانتیا برابرولو، د افغان کډوالو د شته ستونزو په موخه له پاکستان او ایران سره د درې او څلور اړخیزو ناستو او ګډو همکاریو په اړه خبرې وشوې.

په دې لیدنه کې د ملګرو ملتونو عالي کمېشنرۍ مرستیال ویلي، که څه هم نړۍوال مالي بحران د دوی پر کارونو منفي اغېز کړی، خو هڅې روانې دي څو د کډوالو ستونزو ته د رسېدنې لپاره د اړتیا وړ بودجه راجلب کړي.

نوموړي، له پاکستان او ایرانه د افغان کډوالو جبري ایستل د نړۍوالو اصولو خلاف او د اندېښې وړ موضوع یاده کړې او زیاته کړې یې ده چې د کډوالو برخه کې د ملګرو ملتونو ادارې کډوالو ته د ښارګوټو په جوړولو کې مرستو ته تيارې دي.

سرچینې د معلوماتو له مخې، په دې لیدنه کې مولوي عبدالکبیر ویلي، د کډوالو او راستنېدونکو چارو وزارت هڅه کوي چې د راستنو شوو کډوالو او بې‌ځایه شوو کورنیو لپاره لازمې اسانتیاوې برابرې کړي او کېدونکې مرستې به په شفاف ډول اړمنو او مستحقو کسانو ته ورسوي.

هغه هېواد ته د کډوالو راستنول خپل لومړیتوب بللی او زیاته کړې ده چې وخت او فرصت باید په پام کې ونیول شي او کډوال له نړۍوالو اصولو سره سم په خپله خوښه هېواد ته راستانه شي.

د سرچینې د معلوماتو له مخې، په دې ناسته کې دواړو لورو له یو او بل سره په لا همغږۍ او ګډو همکاریو ټینګار وکړ.

GET IN TOUCH

SUGGEST A STORY

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

PAJHWOK MOBILE APP

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.