<p style="text-align: justify;">کابل (پژواک، ۳۰ مرغومی ۱۴۰۳): روسي رسنيو راپور ورکړی چې د ایران ولسمشر ویلي، د دغه هېواد او روسیې ترمنځ د ستراتیژیکو همکاریو تړون په دې معنا دی چې دغه دواړه هېوادونه هيڅ بهرنی فشار نه مني او په سیمه کې امنیت تامینولی شي.</p>
<p style="text-align: justify;">د <strong><a href="https://tass.com/world/1901185">ټاس</a> </strong>خبري اژانس د راپور له مخې، د ایران ولسمشر مسعود پزشکیان په مسکو کې له «سلووف لایف» ټلوېزيون سره په خبرو کې ویلي چې مسکو او تهران نه غواړي چې څوک یې له بهره رول وټاکي.</p>
<p style="text-align: justify;">هغه زیاته کړې: «موږ د خپلواکو پالیسیو تعقیبولو توان لرو او چمتو یو چې په ګډه په سیمه کې امنیت او اقتصاد ته وده ورکړو؛ دلته د سولې او ثبات راوستلو لپاره موږ لوېدیځ ته اړتیا نه لرو.»</p>
<p style="text-align: justify;">پژشکیان ویلي، د روسیې او ایران ترمنځ د هر اړخیزو ستراتیژیکو همکاریو تړون دا پیغام ورکوي چې دواړه هېوادونه به هيڅ ډول بهرنی فشار ونه زغمي او په سیمه کې د امنیت د تامینولو وړتیا لري.»</p>
<p style="text-align: justify;">د راپورونو له مخې، وړمه ورځ د ایران ولسمشر مسعود پزشکیان په مسکو کې د روسیې له ولسمشر ولادیمیر پوتین سره یوه «هراړخیزه ستراتیژیکه هوکړه» لاسلیک کړې چې له مخې به یې په پوځي، سیاسي، سوداګریزو او اقتصادي برخو کې د تهران او مسکو ترمنځ اړیکي پیاوړې شي.</p>
