کابل (پژواک، ۱ سلواغه ۱۴۰۳): د افغانستان د سترې محکمې قضايي پلاوي له ایران غوښتي څو د هغو مافیايي ډلو مخه ونیسي چې په دغه هېواد کې یو شمېر افغانان تښتوي او بیا یې د خوشي کېدو په بدل کې د هغوی له کورنیو د پیسوغوښتنه کوي.
د سترې محکمې په خبرپاڼه کې راغلي چې د اسلامي امارت قضایي پلاوي ایران ته د سفر په ترڅ کې تېره ورځ د ایران د کورنیو چارو وزارت د امنیتي چارو له مرستیال او د یاد وزارت د کډوالۍ ملي سازمان له رییس سره لیدلي.
د سترې محکمې اداري مرستیال شيخ عبدالمالک حقاني په مشرۍ یو لوړرتبه قضایي پلاوی د تېرې مرغومې میاشتې په ۲۸مه له ایراني مسوولینو سره د لیدنې په موخه تهران ته ولاړ.
د سترې محکمې قضایي پلاوي په دې لیدنه کې د ایران له مسوولینو غوښتنه وکړه چې په یاد هېواد کې افغان کډوالو ته د اسانتیاوو برابرولو په موخه د هغوی اقامت تمدید کړي.
د افغانستان قضایي پلاوي د انساني قاچاق او نشهیي توکو د مخنیوي په اړه وویل، افغانستان د انساني قاچاق او نشهیي توکو اړوند بانډونو پر وړاندې مبارزې برخه کې پوره همکارۍ ته ژمن دی او په دې اړه د اسلامي امارت مشرتابه ځانګړي فرمانونه هم صادر کړي دي.
حقاني د ایران له مسوولینو وغوښتل چې د یاد هېواد په ځینو ښارونو کې د افغان کډوالو پر بانکي حسابونو لګېدلی بندیز لرې کړي او له دوی د تېرو کلونو غوښتل شوي مالیات دې معاف شي.
د سترې محکمې اداري مرستیال له ایراني مسوولینو دغهراز وغوښتل چې په ایران کې د هغو مافیايي ډلو مخه ونیسي چې یاد هېواد کې یو شمېر افغانان تښتوي او بیا یې د خوشي کېدو په بدل کې له کورنیو د ډېرو پیسو غوښتنه کوي.
حقاني په دې اړه نور جزییات نه دي ورکړي.
خبرپاڼه کاږي، د ایران د کورنیو چارو وزارت د امنیتي چارو مرستیال او د کډوالۍ ملي سازمان رئیس په خپلو خبرو کې د اسلامي امارت د سترې محکمې قضایي پلاوي ته تر هرکلي وروسته ډاډ څرګند کړ چې ایران کې به د مافیايي ډلو د مخنیوي لپاره ځانګړې هڅې کوي.
نوموړي د دواړو هېوادو ترمنځ په امنیتي برخو کې د همکاریو د پراختیا او تقویې په موخه افغانستان ته د ایراني امنیتي پلاوي د سفر وړاندیز هم وکړ.
