<p style="text-align: justify;">کابل (پژواک، ۲ سلواغه ۱۴۰۳): د امریکا نوي ولسمشر، د ناقانونه کډوالو د مخنیوي په موخه له مکسیکو سره پر پوله بېړنی حالت اعلان کړ او امریکا کې زېږدلو کډوالو ماشومانو ته د تابعیت ورکولو طرحه یې وځنډوله او دغه راز هغه الوتنې یې لغوه کړې چې څه باندې ۱۶۰۰ افغان پناهغوښتونکي یې امریکا ته لېږدول.</p>
<p style="text-align: justify;">د <strong><a href="https://www.reuters.com/world/us/trump-declare-national-emergency-border-trump-official-says-2025-01-20/">رویټرز</a> </strong>خبري اژانس راپور له مخې، د امریکا نوي ولسمشر ډونالډ ټرمپ د نوو فرمانونو د اعلان په لړ کې د ناقانونه کډوالو د مخنیوي په موخه له مکسیکو سره پر ګډه پوله بېړنی حالت اعلان کړ او په پام کې ده چې هلته اضافي امنیتي تدابیر هم ونیسي.</p>
<p style="text-align: justify;">راپور کې راغلي چې ټرمپ هغه ډلې چې له مکسیکو پولې ور اوړي او جنايي پېښې ترسره کوي د ترهګریزو ډلو په نوم ونومولې.</p>
<p style="text-align: justify;">د راپور په حواله، ټرمپ د کډوالو هغو ماشومانو ته د تابعیت ورکولو طرحه هم نږدې څلور میاشتو لپاره وځنډوله چې په امریکا کې زېږېدلي څو د پلرونو او مېندو قضیه یې معلومه شي.</p>
<p style="text-align: justify;">ټرمپ تېره ورځ د وفادارۍ لوړې په مراسمو کې یو ځل بیا ټینګار وکړ چې میلونونه هغه کډوال به باسي چې په امریکا کې د پاتې کېدو قانوني اسناد نهلري خو د قانوني کډوالو د پروګرامونو په هکله یې څه ونه ویل.</p>
<p style="text-align: justify;">همداراز د رویټرز راپور له مخې، په متحده ایالاتو کې د افغان کډوالو د بیا مېشت کېدو د یوې ادارې مسوولین وایي چې د ولسمشر ډونالډ ټرمپ حکومت یوې پرېکړې له امله د هغو ۱۶۰۰ افغانانو الوتنې هم لغوه شوې چې امریکا ته د تګ لپاره یې ټولې مرحلې بشپړې کړې وې.</p>
<p style="text-align: justify;">د افغانانو د انتقال ایتلاف (AfghanEvac) مشر شان وانډیور تېره ورځ رویټرز خبري اژانس ته ویلي، هغوی چې پروازونه یې لغوه شوي یو شمېر یې د امریکا د پوځ د فعالو غړو د کورنیو غړي دي.</p>
<p style="text-align: justify;">د ټرمپ راتلونکي حکومت یو چارواکي د نوم نه ښودلو په شرط ویلي چې نوی ولسمشر ښایي په یو اجرائیوي فرمان کې د څلورو میاشتو لپاره امریکا ته د کډوالو د راتګ پروګرامونه وځنډوي.</p>
<p style="text-align: justify;">یو شمېرامریکایي چارواکو هم د رویټرز خبري اژانس ته د نوم نه ښودلو په شرط ویلي چې په دې کسانو کې چې پروازونه یې لغوه شوي، د هغو افغانانو واړه ماشومان هم شامل دي چې وار دمخه په امریکا کې مېشت دي.</p>
<p style="text-align: justify;">سپینې ماڼۍ او د متحده ایالاتو د بهرنیو چارو وزارت چې د کډوالو پروګرامونه څاري، تراوسه یې د رویټرز خبري اژانس ته د دې موضوع په هکله د وضاحت لپاره ځواب نه دی ورکړی.</p>
<p style="text-align: justify;">د راپورونو له مخې، د ۲۰۲۱ زېږدیز کال راهیسې د مخکني ولسمشر جو بایډن حکومت نږدې ۲۰۰ زره افغانان متحده ایالاتو ته راوستي دي.</p>
