ننګرهار کې د صنعتي فابریکو جوړولو لپاره ۲۰ زره جریب ځمکه ځانګړې کېږي

جلال‌اباد (پژواک، ۲ سلواغه ۱۴۰۳): د ننګرهار مرستيال والي وايي، په دغه ولايت کې د صنعت او سوداګرۍ پراختيا لپاره هڅې ګړندۍ شوې او سوداګرو ته د صنعتي فابریکو جوړولو لپاره ۲۰ زره جریب ځمکه ورکول کېږي.

دغه څرګندونې مولوي عزیزالله مصطفی په جلال‌اباد ښار کې د ختيځ زون په کچه د پانګونې، فرصتونو او ننګونو په تړاو جوړ شوي کنفرانس کې وکړې.

په دغه کنفرانس کې سوداګرو د خپلو ستونزو په تړاو خبرې وکړې او د ختيځو ولايتونو مسوولینو د سوداګرۍ د ودې لپاره د فرصتونو په تړاو معلومات شریک کړل.

په کنفرانس کې د ننګرهار مرستيال والي مولوي عزیزالله مصطفی وويل، سوداګر د هېواد د اقتصادي پرمختګ واک لاس کې لري او اسلامي امارت هم دوی ته د امنيت او نورو برخو کې ډېرې اسانتياوې رامنځته کړې دي.

دی وايي: «حکومت سوداګرو ته د ستونزو د حل لپاره په ملي او نړۍواله کچه هڅې روانې کړې دي؛ موږ د سوداګرو د ژوند او مال ساتنې ته ځانګړې پاملرنه کړې او د امنیت په ټینګښت کې یې ځانګړي ګامونه اخیستل شوي دي.»

د مولوي عزیزالله مصطفی په خبره، په دغه ولايت کې د سوداګرۍ او صنعت د ودې لپاره ۲۰ زره جریب ځمکه ځانګړې شوې چې د فابریکو جوړولو لپاره به سوداګرو ته ورکړل شي.

بلخوا، د لغمان والي شيخ شېراحمد حقاني هم په خپل ولايت کې د سوداګرۍ او پانګونې فرصتونو په تړاو خبرې وکړې او زياته يې کړه چې په لغمان کې د سوداګرۍ او صنعت برخه کې د فرصتونو ترڅنګ د کرنې او مالدارۍ برخه کې هم پراخې سرچینې موجودې دي.

دغه راز، د نورستان مرستيال والي مولوي مختيار فيصل بیا په ياد ولايت کې د قیمتي او نيمه قيمتي ډبرو برخه کې د پانګونې سرچینو په تړاو وويل چې دغه ولايت بډای کانونه لري چې پر هغو د ښې پانګونې له لارې کېدای شي هم د نورستان او د ټول هېواد اقتصاد وده وکړي.

په افغانستان کې د کار نړۍوال سازمان استازي ګونجان بلاکوټي وويل، اوسمهال په افغانستان کې د سوداګرۍ او صنعت برخه کې د ښځو ونډه هم ډېره مهمه ده چې د اسلامي امارت له لوري ورته ښه زمينه برابره شوې او د کار نړۍوال سازمان د دغه کار له امله د حکومت منندوی دی.

د کنفرانس ګډونوالو د سوداګرۍ او پانګونې برخو ستونزو هوارولو لپاره د حکومت د هڅو هرکلی وکړ او ټینګار یې وکړل چې سوداګر باید په ګډه د هېواد د اقتصادي پیاوړتیا لپاره هڅې وکړي.

د ننګرهار د سوداګرۍ خونې مرستیال حضرت‌ولي هډه‌وال وايي، سوداګر د ويزو او بهر ته د تګ او له بهره د سوداګرۍ برخه کې له ګڼو ستونزو سره مخ دي چې حکومت يې بايد ستونزې حل کړي.

د ننګرهار د سوداګرۍ او پانګونې خونې غړي ډاکټر مخلص‌احمد وويل، حکومت بايد د سوداګرۍ او صنعت پر وړاندې پراته خنډونه له منځه یوسي او تر ډېره يې له پاکستان سره د ترانزیټ او ترانسپورټ برخو کې د ستونزو پر حل ټينګار وکړ.

بلخوا، د افغانستان د سوداګرۍ او پانګونې خونې د مديره پلاوي غړي خان‌جان الکوزي د ختيځو ولايتونو له سوداګرو وغوښتل چې خپلې ستونزې دې په لیکلي بڼه له دوی سره شریکې کړي، څو د حل په موخه یې په مرکز کې د سوداګرۍ، مالیې، ترانسپورټ او نورو اړوندو وزارتونو او د رياست‌الوزرا له اقتصادي مرستيال سره شریکې کړي.