کابل (پژواک، ۵ دلو ۱۴۰۳): د ټولګټو وزارت د رېلپټلۍ معین د ازبکستان د ترانسپورټ له وزیر سره لیدنه کې د افغان - ټرانس پروژې د عملي کار د پیل د څرنګوالي په اړه خبرې کړې دي.
د ټولګټو وزارت ویاند محمداشرف حقشناس نن (جمعه) پر خپله اېکسپاڼه لیکلي چې د دغه وزارت د رېلپټلۍ معین مولوي محمداسحاق صاحبزاده د یوه پلاوي په مشرۍ ازبکستان ته سفر کړی دی.
هغه ویلي، صاحبزاده په دغه سفر کې د ازبکستان د ترانسپورټ له وزیر الهام محکموف سره لیدلي دي.
حقشناس زیاته کړې چې یاده لیدنه کې دواړو خواوو د افغان - ټرانس پروژې د عملي کار د پیل او د همغږۍ د چټکېدو په تړاو خبری اترې کړې دي.
هغه زیاته کړې چې دغه سفر د افغانستان او ازبکستان ترمنځ د دوه اړخیزو سوداګریزو او اقتصادي اړیکو دوام او پراختیا په موخه شوی دی.
د سرچینې په خبره، مولوي محمداسحاق صاحبزاده په دغه سفر کې د ازبکستان د رېلپټلۍ د ادارې له رییس نرزلوف زفرغیاسویچ او د دې ادارې له مرستیال حکمتالله رحمتوف سره هم غږېدلی دی.
د افغانستان، ازبکستان او پاکستان (افغان - ټرانس) د رېلپټلۍ پروژه چې ۷۸۰ کیلومتره اوږدوالی لري او د افغانستان له لارې مرکزي اسیا له جنوبي اسیا سره نښلوي، په افغانستان کې د بلخ ولایت له مرکز مزارشریف ښاره پیل او د ننګرهار ولایت د تورخم تر ښارګوټی رسېږي.
د دې پروژې لومړۍ ساحوي سروې د تېر کال په اګسټ کې بشپړه شوې ده.
GET IN TOUCH
NEWSLETTER
SUGGEST A STORY
PAJHWOK MOBILE APP