<p style="text-align: justify;">کابل (پژواک، ۱۰ سلواغه ۱۴۰۳): هندي چارواکو ویلي چې په دغه هېواد کې د «ماها کومب» په نوم لوی جشن کې د خلکو د ډېرې ګڼېګوڼې له امله اووه کسان مړه او ۱۰ نور ټپیان شوي دي.</p>
<p style="text-align: justify;">رسنیو راپور ورکړی چې یاده پېښه نن سهار (چهارشنبه، د سلواغې ۱۰مه) د هند د شمال په اوترا پرادېش ایالت کې شوې او یادو کسانو د ډېرې ګڼېګوڼې له امله ژوند له لاسه ورکړی دی.</p>
<p style="text-align: justify;">د راپور له مخې، د بېپیلوټه الوتکو ویډیوګانې ښیي چې میلیونونه کسان د ماها کومب مالا په شانداره ورځ اوږه په اوږه له سباوون مخکې تیاره کې د لامبو یا غوټې وهلو لپاره د یوه سیند پر لور درومي.</p>
<p style="text-align: justify;">«ماها کومب» د نړۍ تر ټولو لوی مذهبی جشن دی چې په هرو درېیو کلونو کې یو ځل د ۵۵ ورځو لپاره د هند په یوه ښار کې ترسره کېږي او هندوان ځانونه په سیندونو کې مینځي او پر دې باور دي چې په دغو مراسمو کې په ګډون سره له ګناهونو پاکېږي.</p>
<p style="text-align: justify;">دا په داسې حال کې ده چې دوه ورځې مخکې هم د هند په «اوترا پرادېش» کې د یوه چت لوېدو له امله اووه کسانو ژوند له لاسه ورکړ او څه باندې ۵۰ نور ټپیان شول.</p>
