د کرنې ریاست: بغلان د چرګ غوښې د تولید له اړخه پر ځان بسیا شوی

پلخمري (پژواک، ۱۶ سلواغه ۱۴۰۳): د بغلان د کرنې او مالدارۍ ریاست مسوولین وایي چې په دغه ولایت کې د غوښې چرګانو ۳۰۰ فارمونه فعال دي او هر کال شاوخوا نهه زره مټریک ټنه غوښه تولیدوي خو فارم‌لرونکي بیا د چرګانو د دانې او درملو بیو له لوړوالي شکایت کوي.

د بغلان د کرنې، اوبولګولو او مالدارۍ ریاست مطبوعاتي مسوول ولي امرخېل پژواک خبري اژانس ته وویل چې په دغه ولایت کې د چرګانو فارمونه ډېر شوي او دغه ولایت د چرګ غوښې د تولید له اړخه پر ځان بسیا شوی دی.

هغه زیاته کړه: «بغلان کې د چرګانو فارمونو شمېر۳۰۰ ته رسېدلی او په کال کې ۹۰۰۰ مټریک ټنه غوښه تولیدوي چې د بغلان ولایت اړتیا پوره کولو ترڅنګ ګاونډيو ولایتونوته هم استول کېږي.»

د نوموړي په خبره، په دغو ۳۰۰ فارمونو کې۱۵۰۰ کسانو ته په مستقیم ډول د کار زمینه هم برابره شوې ده.

هغه زیاتوي، په تېرو کلونو کې به بغلان ته د چرګ غوښه له کابل، ننګرهار او یا نورو ولایتونو وروړل کېده چې بیه به یې هم لوړه وه خو اوس په دغه ولایت کې د چرګانو روزنې فارمونو په جوړېدو سره د غوښې اړتیا پوره شوې ده.

بلخوا بیا په دغه ولایت کې د چرګانو فارم‌لرونکي وايي، د فارمونو په ډېرېدو سره پّ دغه ولایت کې د چرګ غوښې بیه ټیټه شوې خو د چرګانو د پالنې لګښتونه ډېر شوي دي.

یوه فارم‌لرونکي محمد دیان وویل، د چرګانو فارمونه ډېر شوي خو ګټه یې کمه شوې ده.

هغه زیاته کړه: «بغلان کې د چرګانو فارمونو په ډېرېدو د چرګ غوښې تولید ډېر شوی خو نرخ یې ښکته شوی، یو کیلو ژوندی چرګ په ۱۳۵ افغانۍ دی خو د چرګانو د دانې او دوا قیمتونه بیا تقریبآ دوه برابره لوړ شوي چې له امله یې د فارم‌لرونکو ګټه کمه شوې ده.

د نوموړي په خبره، د چرګانو یوه بوجۍ دانه له ۱۴۰۰ افغانیو څخه ۲۳۰۰ افغانیو ته پورته شوې، د دوا بیه هم لوړه شوې ده او په خبره یې، که د سون توکي هم ورسره حساب شي، پر یو کیلو چرګ ۱۲۰ افغانۍ مصرف راځي چې د بازار اوسنۍ بیه کې خپل لګښتونه هم په سختۍ پوره کوي .

دوی له حکومته د چرګانو د دانې او درملو د بیو او د بازار د کنټرول برخو کې د همکارۍ غوښتنه کوي.