له افغانستانه ازبکستان ته وړل شوې اووه بلک‌هاک چورلکې امریکا ته سپارل شوې

کابل (پژواک، ۱۷ سلواغه ۱۴۰۳): د راپورونو له مخې، د مخکني حکومت د ړنګېدو پر مهال، له افغانستانه ازبکستان ته د لېږدول شویو چورلکو له جملې اووه بلک‌هاک چورلکې بېرته امریکا ته سپارل شوې دي.

د راپورونو له مخې، د ۱۴۰۰ لمریز کال په زمري میاشت کې د مخکني حکومت د ړنګېدو پر مهال د افغان حکومت له څلوېښتو ډېرې الوتکې او چورلکې ازبکستان او تاجکستان ته لېږدول شوې وې.

طلوع نیوز د ازبکستاني رسنیو له قوله خبر ورکړی چې د یادو چورلکو له جملې، اووه بلک هاک چورلکې یې بېرته امریکا ته سپارل شوې دي.

راپور کې راغلي، دا خبره د ازبیکستان د وسله‌والو ځواکونو د جوړېدو د ۳۳مې کالیزې د نمانځلو په مراسمو کې چې په واشنګټن کې د ازبیکستان په سفارت کې جوړ شوي وو، افشا شوې ده.

سرچېنې زیاته کړې، دا هغه اووه چورلکې دي چې د کار وړ ګڼل شوې او د امریکا دفاع وزارت مرستیال، ډېوېس فلوریک له ازبیکستانه د اوږدمهالې نظامي ملګرتیا او د افغان کډوالو د ایستلو په لړ کې له همکارۍ مننه او ستاینه کړې ده.

له دې وړاندې د افغانستان د ملي دفاع وزارت سرپرست، مولوي محمد یعقوب مجاهد له هغو هېوادونو چې د افغانستان چورلکې او پوځي الوتکې ورسره دي، په ټینګار سره غوښتي وو چې دغه الوتکې افغانستان ته وسپاري او دوی دې غبرګون ته نه اړ کوي.