ننګرهار کې د دوو کورنيو ترمنځ ۱۳ کلنه دښمني ختمه شوه

جلال‌اباد (پژواک، ۲۴ سلواغه ۱۴۰۳): د ننګرهار ولايت په درۀنور ولسوالۍ کې د قومي مشرانو او ځايي چارواکو په هلو ځلو د دوو دښمنو کورنيو ترمنځ روغه وشوه.

مسوولین وايي، د دغو کورنيو ترمنځ ۱۳ کاله مخکې د ځمکې د مالکيت پر سر شخړه شوې وه چې دواړو خواوو ته په کې مالي او ځاني زيانونه اوښتي وو.

د ننګرهار ولايت د امنیې قوماندانۍ وياند سيد طیب حماد د سلواغې په ۲۴مه پژواک خبري اژانس ته وويل، د درۀنور ولسوالۍ اړوند وایګل سيمه کې د سيمه‌ييزو چارواکو، قومي مشرانو او ديني عالمانو په منځګړیتوب د دوو دښمنو کورنيو ترمنځ روغه وشوه.

دی وايي، د کمال شاه او مومن خان په نومونو د دغو دوو ځايي اوسېدونکو د کورنيو ترمنځ ۱۳ کاله مخکې د ځمکې پر سر شخړه شوې وه چې دواړو خواوو ته په کې مالي او ځاني زيانونه اوښتي وو.

هغه زیاته کړه، د ځايي قومي مشرانو او چارواکو په هلو ځلو دواړو خواوو يو بل ته بښنه وکړه او وروسته له ۱۳ کلونو له دښمنۍ لاس پر سر شول.

بلخوا بیا په شخړه کې ښکیلې کورنۍ خوښې دي چې له څه باندې یوې لسیزې وروسته د سولې په ټغر سره راټولیږي او د کلونو وروسته یو بل په غېږ کې نیسي.

د کمال شاه د کورنۍ يوه غړي رحمت‌الله پژواک سره خبرو کې له مسوولینو او قومي مشرانو مننه وکړه چې د دوی ترمنځ یې د کلونو دښمني پر دوستۍ بدله کړه او د دوی ترمنځ بل شوي اور یې مړ کړ.

پرون په همدې تړاو په وایګل سیمه کې يوه جرګه هم جوړه شوې وه او په کې دواړو لوریو ژمنه وکړه چې بیا به هېڅکله یو بل ته د زیان اړولو هڅه ونه کړي او تل به د ورورولۍ په فضا کې ژوند کوي.