کابل (پژواک، ۳۰ سلواغه ۱۴۰۳): د کورنیو چارو وزارت وایي، د کابل ښار اوومې امنیتي حوزې مربوطاتو کې د انسانتښتوونکو یوه شپږکسیزه ډله نیول شوې او دوه کسان یې له منګولو ژغورل شوي دي.
د کورنیو چارو وزارت ویاند مفتي عبدالمتین قانع پر خپله اېکسپاڼه لیکلي چې دغه عملیات یې د کابل ښار اوومي امنیتي حوزې اړوند سیمه کې ترسره کړي او د پروان د سرخ پارسا ولسوالۍ دوه اوسېدونکي یې د یادو انسانتښتوونکو له منګولو ازاد کړي دي.
قانع د جزئیاتو له ورکولو پرته لیکلي، دغه راخوشي شوي کسان څه موده مخکې په ايران کې تښتول شوي وو او تښتوونکو د هغوى د خلاصون په بدل کې ١٥٠ زره امريکايي ډالر غوښتي وو.
هغه لیکلي، نيول شوي کسان د نورو څېړنو لپاره اړوندو ادارو ته سپارل شوي دي.
