ګردېز (پژواک، د کب لومړۍ نېټه ۱۴۰۳): د پکتيا د پوهنې ريیس وايي چې د دغه ولایت د مرکز ګردېز په ګډون په ځینو ولسواليو کې د ۳۲ ښوونځيو د ودانيو جوړولو چارې چې د تېر حکومت پر مهال پيل شوې وې، لا هم نیمګړې پاتې دي.
د مسوولینو د معلوماتو له مخې، د یادو پروژو له ډلې ۲۷ یې د نړۍوال بانک د ۵۰۰ میلیون افغانیو او پنځه یې د پوهنې وزارت د ۹۵ میلیون افغانیو په لګښت پلې کېدې خو اوس یې چارې نیمګړې پاتې دي.
په دې اړه د پکتیا د پوهنې رییس مولوي عبدالقیوم فاروقي پژواک خبري اژانس ته وویل چې د تېر حکومت پر مهال د مرکز ګردېز په ګډون ځینو ولسواليو کې د ۳۲ ښوونځيو د ودانيو جوړولو چارې پيل شوې وې خو بشپړې شوې نه دي.
د هغه د معلوماتو له مخې، د یادو ښوونځيو له ډلې پنځه په مرکز ګردېز، شپږ په ځاځي اریوب، درې -درې په جانيخېل، احمدخېل، لجهمنګل او سیدکرم، دوه - دوه په څمکني، زرمت او ډنډپټان او یو - یو په ګرده څېړې، وزي ځدراڼ او احمدابا ولسوالیو کې دي.
د نوموړي په خبره، په نیمګړو پاتې يادو ودانيو کې د لېسو، منځني او لومړنيو ښوونځيو ودانۍ شاملې دي.
فاروقي وویل چې د يادو ودانيو چارې د تېر حکومت پر مهال په اوسط ډول تر ۸۵ سلنه بشپړ شوې خو له هغه وروسته يې چارې تر اوسه هماغسې نیمګړې پاتې دي.
د پوهنې ریيس دغه راز زياته کړه چې له سیاسي تحول وروسته نړۍوال بانک خپل فعاليتونه په افغانستان کې ودرول او د يادو ودانيو ترسره شوې چارې يې اوس بېرته له تخريب سره مخ دي.
د نوموړي په خبره چې ياده موضوع يې د پوهنې وزارت له مسوولینو سره شريکه کړې څو د يادو ۳۲ ودانيو نيمګړې چارې بشپړې کړي.
ورته مهال، د پکتيا يو شمېر اوسېدونکي هم د یادو ښوونځیو د ودانیو د پاتې چارو بشپړېدو غوښتنه کوي.
د ځاځي اريوب ولسوالۍ يوه قومي مشر انور صديقي پژواک ته وويل: «زموږ د اريوب ولسوالۍ په کوز علي سنګي، حسن الګاډي، پيټلاو، ګلغونډۍ او ستيا کليو کې د پنځو ښوونځيو د ودانيو چارې نیمګړې پاتې دي.»
هغه زیاته کړه چې د يادو ودانيو د نه بشپړېدو له امله سلګونه زدهکوونکي د درسي بهير پر مهال له ګڼو ستونزو سره مخ دي.
د دغه ولایت یو شمېر نورو خلکو هم ورته څرګندونې وکړې او د خپلو سیمو د ښوونځیو د ودانیو د پاتې چارو د بشپړېدو غوښتنه یې وکړه.
د پوهنې رياست د معلوماتو له مخې، دا مهال د پکتيا یو شمېر ولسواليو کې ۱۶۵ دولتي ښوونځي ودانۍ نه لري.
