افغان او ازبېک چارواکو د کرنیزو همکاریو پر پراختیا خبرې وکړې

کابل (پژواک، ۵ کب ۱۴۰۳): د کرنې، اوبولګولو او مالدارۍ وزارت سرپرست د ازبېکستان د کرنې له وزیر سره په لیدنه کې د دواړو هېوادونو په بندرونو کې د نباتي قرنطین، بزګرانو ته د اصلاح شوو تخمونو د وېش، د اوبو مدیریت، د څاڅکي اوبو لګولو سیسټم پراخولو په اړه خبرې کړې دي.

د کرنې، اوبو لګولو او مالدارۍ وزارت په خبرپاڼه کې راغلي چې د دغه وزارت سرپرست مولوي عطاءالله عمري په تاشکند کې د ازبېکستان د کرنې له وزیر ابراهیم عبدالرحمن‌اف سره وکتل.

خبرپاڼه کې راغلي چې دواړو لوریو د دواړو هېوادونو په بندرونو کې د نباتي قرنطین، بزګرانو ته د اصلاح شوو تخمونو د وېش، د اوبو مدیریت، د څاڅکي اوبو لګولو سیسټم پراخولو او د ازبېکستان د خصوصي سکټور پانګونې ته د زمینې برابرولو برخو کې د همکاریو پر پیاوړتیا خبرې کړې دي.

یاد وزارت لیکلي، د ازبېکستان د کرنې مسوولینو په دې لیدنه کې د اوبو مدیریت برخه کې د خپلو متخصصینو پر لوړو ظرفیتونو ټینګار وکړ او ډاډ یې ورکړ چې دوی کولی شي د سربندونو، د اوبو لګولو کانالونو او د افغانستان د اوبو سرچینو د ښه تنظیم برخو کې همکاري وکړي.

د افغانستان د کرنې، اوبو لګولو او مالدارۍ وزارت سرپرست مولوي عطاءالله عمري وړاندیز کړی چې د دواړو لوریو متخصصین دې د نظریاتو او تجربو د تبادلې لپاره یو منظم میکانیزم جوړ کړي.

یاد وزارت لیکلي، په دغه لیدنه کې پرېکړه وشوه چې د دواړو هېوادونو د کرنې وزارتونو تخنیکي مرستیالان به د دغو توافقاتو د تطبیق پر څرنګوالي کار وکړي، څو د افغانستان او ازبېکستان ترمنځ کرنیزې او مالدارۍ همکارۍ لا پیاوړې شي.