ایبک (پژواک، ۲۱ غویی ۱۴۰۴): د سمنګان سیمهییز مسوولین وایي چې د دغه ولایت د یوه قومي مشر د وژلو په پېښه کې د لاس لرلو په تور درې کسان نیول شوي دي.
د سمنګان د امنیې قوماندانۍ ویاند حشمتالله رحماني پژواک خبري اژانس ته وویل چې دغه قومي مشر د تېرې اونۍ د پنجشنبې په ورځ مازدیګر مهال یوې ټلیفوني اړیکي ته له ځواب ورکولو وروسته په یوه کرولا موټر کې له خپل کوره وتلی او بیا لادرکه شوی وو.
د رحماني په خبره، د پولیسو په هڅو د یاد کس مړی موندل شوی او څېړنې ښيي چې وژل شوی دی.
هغه وویل چې د دغه قومي مشر د وژلو په تور د امنیتي ځواکونو لخوا درې کسان نیول شوي او په دې اړه څېړنې روانې دي.
د سمنګان د امنیې قوماندانۍ ویاند د پېښې لامل شخصي دښمني بللې ده.
د یادونې ده چې وژل شوی کس حاجي محمداکبر نیازی نومېده او د سمنګان قومي مشر و چې دوه کاله مخکې د ایبک د یوې ناحیې د ګذر د وکیل په توګه ټاکل شوی و.
GET IN TOUCH
NEWSLETTER
SUGGEST A STORY
PAJHWOK MOBILE APP