کابل (پژواک، د غبرګولي لومړۍ نېټه ۱۴۰۴): چین د یوې درې اړخیزې ناستې له کوربهتوب وروسته ویلي چې افغانستان او پاکستان د خپلو ډیپلوماتیکو اړیکو پراخولو ته لېوالتیا لري.
د رویټرز خبري اژانس د راپور له مخې، د چین د بهرنیو چارو وزیر وانګ یي د افغانستان د بهرنیو چارو له سرپرست وزیر مولوي امیر خان متقي او د پاکستان د بهرنیو چارو وزیر اسحاق دار سره له خبرو وروسته ویلي چې دغو ګاونډیو هوکړه کړې چې ډېر ژر به یو بل ته سفیران واستوي.
نوموړي ویلي چې دغو دواړو هېوادونو د ډیپلوماتیکو اړیکو پراخولو ته لېوالتیا ښودلې ده.
هغه ویلي: «چین له دې چارې هرکلی کوي او لېواله دی چې د افغانستان او پاکستان د اړیکو ښه کېدو لپاره خپلو مرستو ته دوام ورکړي.»
د افغانستان، چین او پاکستان ترمنځ درې اړخیزه ناسته تېره ورځ په بیجینګ کې ترسره شوه.
د یادونې ده چې تېره ورځ مولوي امیرخان متقي له خپل چیني سیال سره د دواړو هېوادونو ترمنځ د اقتصادي همکاریو پراختیا او سوداګرۍ ډېرېدو په اړه خبرې کړې وې.
د چین د بهرنیو چارو وزیر له افغانستانه د سیاسي او اقتصادي ملاتړ لپاره ژمنه وکړه.
GET IN TOUCH
NEWSLETTER
SUGGEST A STORY
PAJHWOK MOBILE APP