<p style="text-align: justify;">کابل (پژواک، ۱۱ غبرګولی ۱۴۰۴): د راپورونو له مخې، په روسیه کې پر یوه مسافروړونکي رېلګاډي د پله نړېدو له امله اووه کسان مړه او ۳۳ نور ټپیان شوي دي.</p>
<p style="text-align: justify;">د روسیې دولتي اژانس <strong><a href="https://tass.com/emergencies/1966503?utm_source=twitter.com&utm_medium=social&utm_campaign=smm_social_share">ټاس</a> </strong>لیکلي چې یاده پېښه د شپې مهال د روسیې د بریانسک ولایت په فیګونیچسکي سیمه کې شوې ده.</p>
<p style="text-align: justify;">د بریانسک قوماندان الکساندر بوګومز ویلي چې په دې پېښه کې اووه کسان مړه او ۳۰ نور روغتونونو ته لېږدول شوي دي.</p>
<p style="text-align: justify;">نوموړي زیاته کړې چې د یوه ماشوم په ګډون د دوو ټپیانو وضعیت د اندېښنې وړ ښودل شوی دی.</p>
<p style="text-align: justify;">په راپور کې راغلي چې د روسیې د اوسپنې پټلۍ شرکت د یادې پېښې لامل «د لېږد رالېږد عملیاتو کې ناقانونه لاسوهنه» بللې چې پر رېلګاډي د پله نړېدو لامل شوې ده.</p>
