کونړ کې درې ماشومان له مسمومېدو وروسته مړه شوي

اسعداباد (پژواک، ۲۵ غبرګولی ۱۴۰۴): د کونړ امنیه قومانداني وایي چې د دغه ولایت په څوکۍ ولسوالۍ کې درې ماشومان د هیندواڼې له خوړلو وروسته د مسمومیت له امله مړه شوي او یو بل د کوما په حالت کې دی.

د کونړ د امنیې قوماندانۍ ویاند فرید دهقان پژواک خبري اژانس ته وویل، تېره ورځ د دغه ولایت د څوکۍ ولسوالۍ اړوند د بابړو دبیلي سیمه کې څلور ماشومان یوه پالېز ته ورغلي او هلته د هیندواڼې له خوړلو وروسته مسموم شوي وو.

هغه زیاته کړه چې مسموم شوي ماشومان روغتون ته لېږدول شوي خو له ډلې یې درې ماشومان مړه شوي او یو بل د کوما په حالت کې دی.

سرچینه وايي، د پېښې په تړاو یو پالېزوان نیول شوی او دا مهال تر پوښتنو ګروېږنو لاندې دی.