<p style="text-align: justify;">پلعلم (پژواک، ۲۹ غبرګولی ۱۴۰۴): د لوګر د پوهنې ریاست مسوولین وایي چې د ملګرو ملتونو د ماشومانو د ملاتړ صندوق (UNICEF) له دغه ریاست سره د شاوخوا ۳۱ میلیون افغانیو په ارزښت د درسي کتابونو او توکو مرسته وکړه.</p>
<p style="text-align: justify;">د لوګر د پوهنې ریاست ویاند شاهپور عرب پژواک خبري اژانس ته وویل چې د یونیسف په دې مرسته کې د لومړي ټولګيو لپاره په پښتو او دري ژبو ۱۱۸۶۹۸ کتابونه، ۲۵۸ بستې اداري توکي، ۲۰۰۳ بستې تدریسي، ۲۵۶۵ بستې درسي توکي او ۱۰۹ بستې مارکرونه او رنګونه شامل دي.</p>
<p style="text-align: justify;">هغه زیاته کړه چې دغه توکي به د ټاکل شوې سهمیې له مخې د ۲۸۸ ښوونځیو پر ۲۰۰۳ ښوونکو او ۵۱۳۰۰ زدهکوونکو ووېشل شي.</p>
<p style="text-align: justify;">هغه همدارنګه وویل، د یادو درسي او تدریسي توکو وېش نن پنجشنبه (د غبرګوږلي ۲۹مه) د محمداغې ولسوالۍ د حاجیانو او مرکز پلعلم ښار اړوند ملک شېراحمد کوچي په ښوونځیو کې د لوګر د سیمهییزو چارواکو او ملګرو ملتونو د ماشومانو د ملاتړ صندویق(UNICEF) مرکزي زون د مسؤولینو په حضور کې پیل شو.</p>
<p style="text-align: justify;">عرب زیاتوي چې د یادو تدریسي توکو له وېش وروسته د لوګر په مرکز پلعلم او ولسوالیو کې د تدریس برخه کې د ښوونکو ستونزې تر یو بریده هوارې شي.</p>
<p style="text-align: justify;">بلخوا، د مرکز پلعلم ښار یوه ښوونکي میرویس هم پژواک ته وویل، د یونیسف دغه مرسته کولای شي په ښوونځيو کې د زدهکوونکو او ښوونکو د درسي او تدریسي موادو د کمښت ستونزه هواره کړي.</p>
<p style="text-align: justify;">خو نوموړی ټینګار کوي چې پوهنې وزارت او نړۍوال بنسټونه دې د لوګر هغو دولتي ښوونځيو ته هم معیاري ودانۍ جوړې کړي چې اوس مهال یې زدهکوونکي په ازاده فضا کې په زدهکړو بوخت دي.</p>
<p style="text-align: justify;">د یادونې ده، له دې مخکې هم د ملګرو ملتونو د ماشومانو د ملاتړ صندوق (UNICEF) د لوګر ولایت له ښوونځيو سره زرګونه ټوکه کتابونو مرسته کړې وه.</p>
