غزني کې څه باندې سل ځوانان له حرفوي زده‌کړو فارغ شول

<p style="text-align: justify;">غزني‌ښار (پژواک، ۱۳ لړم ۱۴۰۴): د غزني د شهیدانو او معلولینو چارو ریاست وايي چې په دغه ولایت کې څه باندې سل کسان د حرفوي زده‌کړو له پروګرامه فارغ شول.</p>

<p style="text-align: justify;">د غزني د شهیدانو او معلولینو چارو ريیس ملا عبدالحکیم دانش د یاد کسانو فراغت‌غونډه کې وویل چې یادو ځوانانو ته د خیاطۍ، د موبایل ترمیم او چرګانو روزنې برخو کې عملي او نظري زده‌کړې ورکړل شوې دي.</p>

<p style="text-align: justify;">هغه زیاته کړه چې دغه روزنیز پروګرام د بېړنۍ مرستې او پرمختګ خیریه مؤسسې (HHRD) له لوري تطبیق شوی دی.</p>

<p style="text-align: justify;">د دانش په خبره چې له دې زده‌کړو فارغ شوي ځوانان کولای شي په راتلونکي کې د خپلو مهارتونو په مرسته ځان ته د کار زمینه برابره او خپلو کورنیو ته عاید ترلاسه کړي.</p>

<p style="text-align: justify;">ورته مهال، د «HHRD» خیریه مؤسسې ولایتي مسوول شاکرالله امین وویل چې دغه پروګرام د شپږو میاشتو په موده کې پلی شوی او د روزنې، وسایلو او موادو برابرولو لپاره نږدې ۶.۵ میلیون افغانۍ لګښت پرې راغلی دی.</p>

<p style="text-align: justify;">له بلې خوا، له یادو حرفوي زده‌کړو فارغ شوي ځوانان خوښي څرګندوي او وایي چې دا ډول روزنیز پروګرامونه د بې‌کارۍ کچې په راکمېدو او د ځان‌بسیاینې پر لور هڅولو کې مهم رول لري.</p>

<p style="text-align: justify;">د موبایل ترمیم څانګې یوه فارغ محمدوارث وویل: «ما د موبایل جوړونې عملي او نظري زده‌کړې وکړې، اوس به هڅه وکړم خپل کاروبار پيل کړم.»</p>

<p style="text-align: justify;">یو شمېر نورو فارغینو هم غوښتنه وکړه چې دغه ډول پروګرامونه دې لرو پرتو سیمو ته هم وغځول شي څو نور بېکاره ځوانان هم کاري مهارتونه زده کړي.</p>

<p style="text-align: justify;">د یادونې ده، له دې مخکې هم په غزني کې د بېلابېلو خیریه مؤسسو له لوري په سلګونو ځوانانو ته د حرفوي زده‌کړو ورته پروګرامونه ترسره شوي دي.</p>