کابل (پژواک، ۴ غبرګولی ۱۴۰۵): د راپورونو له مخې، د روغتیا نړیوال سازمان مشر اعلان کړی چې د کانګو په ډیموکراټیک جمهوریت کې د ایبولا ناروغۍ څه باندې ۹۰۰ شکمنې پېښې پېژندل شوې دي.
رویټرز خبري اژانس د روغتیا نړیوال سازمان د مشر تدروس ادهانوم ګبریسوس له قوله راپور ورکړی چې له دې ډلې ۱۰۱ پېښې تایید شوې دي.
له بلې خوا، د رویټرز د دوې ورځې مخکې راپور له مخې، د افریقا د ناروغیو د کنټرول او مخنیوي مرکز اعلان کړی چې تر اوسه د ایبولا ویروس له امله لږ تر لږه ۱۷۷ مړینې ثبت شوې دي؛ خو ښايي اصلي شمېر تر دې لوړ وي.
تدروس ادهانوم ګبریسوس خبریالانو ته ویلي: «موږ اوس د خطر ارزونه د ملي کچې لپاره ډېرې لوړې، د سیمهییزې کچې لپاره لوړې او د نړیوالې کچې لپاره ټیټې کچې ته برابروو.»
د دې ویروس د تازه مړو شویو کسانو نوې شمېرې تر اوسه نه دي خپرې شوې.
د ډاکترانو په وینا، ایبولا یوه خطرناکه او ساري ویروسي ناروغي ده چې د ککړو کسانو یا حیواناتو له وینې او د بدن له مایعاتو سره د مستقیم تماس له لارې انتقالېږي. د دې ناروغۍ نښې تبه، شدید کمزوري، سرخوږی، کانګې او په شدیدو حالاتو کې وینهبهېدل دي.
ډاکتران وايي، د شخصي حفظالصحې مراعتول، د لاسونو مینځل او له ککړو کسانو او شیانو سره له تماس څخه ډډه کول د دې ناروغۍ د مخنیوي له مهمو لارو څخه دي.
دا ویروس لومړی ځل په ۱۹۷۶ کال کې د کانګو په ډیموکراټیک جمهوریت کې د ایبولا سیند ته نږدې پېژندل شوی و.
