کابل (پژواک، ۲ چنګاښ ۱۴۰۵): بلجیم د افغانستان د اسلامي امارت د پنځهکسیز پلاوي لپاره، چې ټاکل شوې د کډوالۍ په اړه د اروپايي ټولنې په یوه غونډه کې ګډون وکړي، یو ورځنۍ ویزې صادرې کړې دي.
رویټرز راپور ورکړی چې دغه ویزې د مودې او جغرافیایي ساحې له پلوه محدودې دي او یوازې بلجیم ته د یوه ورځني سفر لپاره اعتبار لري.
اروپايي کمېسیون تېره میاشت د اسلامي امارت چارواکي هغې يوې غونډې ته وربللي وو چې د اروپايي ټولنې په غړو هېوادونو کې د استوګنې له حقه بېبرخې افغان وګړو د بېرته ستنولو او بیا منلو په اړه جوړه شوې ده.
د راپورونو له مخې، یادې ویزې پرون ماښام صادرې شوې دي.
د اروپايي کمېسیون ویاند مارکوس لامرت ویلي، دغه غونډه تخنیکي بڼه لري او د اسلامي امارت د رسمیت پېژندنې معنا نه لري.
د هغه په خبره، د اروپايي ټولنې ځیني غړي هېوادونه د هغو کسانو د ایستلو لپاره د لارو چارو په لټه کې دي چې درانه جرمونه یې ترسره کړي یا د امنیت لپاره ګواښ ګڼل کېږي.
د هغه لیک له مخې چې رویټرز لیدلی، د خبرو اترو اصلي محور به «د هغو افغان وګړو بېرته ستنول او بیا منل وي چې په اروپايي ټولنه کې د استوګنې حق نه لري.»
د اسلامي امارت چارواکو تر اوسه په دې اړه څه نه دي ویلي.
