کابل (پژواک ٤ لړم ٩٠): سږ کال په ٢٤ ولايتونو کې د واورې ورېدو له امله بندې شوې لارې د فوايد عامې وزارت له خوا خلاصېږي.
د فوايد عامې وزارت د ټرانسپورټي بنسټيزو زېرمو د ساتنې او ودانيزو چارو مرستيال ډاکټر احمدشاه وحيد نن (د لړم ٤مه) په يوه خبري غونډه کې وويل، چې دغه کار د ٢٤ ولايتونو په ٢٦٠ سيمو کې ترسره کېږي.
نوموړي وويل، چې د دغه کار لپاره دوى د ياد شوي وزارت له بوديجې څخه ١٧٠ ميليونه افغانۍ ځانګړې کړې دي.
د مرستيال په خبره، د دې پروژې لپاره دوى شپږ مياشتې مخکې چمتووالى نيولى وو او د واورو له ورېدو سره سم به په کار پيل وکړي.
د فوايد عامې وزارت د معلوماتو له مخې، په ټول هېواد کې په ژمي کې ٢٢٤ کيلومتره لاره د واورو ورېدو له امله بندېږي.
د يادونې وړ ده، چې د ژمي په موسم کې د هېواد په زياتره شمالي او يو شمېر نورو ولايتونو کې د واورو د ورېدو له کبله لارې بندېږي او د خلکو په تګ راتګ کې ستونزې پيدا کېږي.
په ځانګړي ډول په سالنګونو کې داسې ډېرې واورې ورېږي، چې ډېر وختونه د تلفاتو لامل هم کېږي؛ تېر کال د سلواغې په ١٩مه، په سوېلي سالنګ کې د واورې د ښويېدو او سخت توپان له امله نږدې ١٧٠ تنه مړه او ١٢٥ نور ټپيان شول.
