لښکرګاه (پژواک ١٦ ورى ٩١): د هلمند د ملي امنيت مسوولين وايي، چې د کجکي ولسوالۍ لپاره د وسلوالو طالبانو د استخباراتو مسوول، درې وسلوال او ٣٠ ميله وسله يې نيولې ده.
د هلمند ولايت د ملي امنيت مسوولينو د وري په ١٦مه پژواک اژانس ته وويل، چې د كجكي ولسوالۍ لپاره د وسلوالو طالبانو د استخباراتو مسوول ملا عبدالحميد يې په ګرشك ولسوالۍ کې د استخباراتي راپورونو له مخې نيولى دى.
د سرچينې په وينا، دغه کسان او وسلې د تېرې اونې په ترڅ کې د عملياتو پر مهال د ګرشک او نادعلي په ولسواليو کې نيول شوي دي.
دوى وايي، چې په لښكرګا كې يې هم د حبيب الله په نوم يو طالب نيولى، چې په ترهګريزو پېښو كې يې لاس در لود.
د ملي امنيت مسوولين وايي، چې يو بل طالب يې هم په نادعلي ولسوالۍ كې په ترسره شوو عملياتو كې نيولى دى.
د يادې سرچينې په خبره، د تېرې اونۍ په اوږدو كې يې ۳۰ميله سپكې او درنې وسلې هم نيولې دي، چې ۱۲ كلاشينكوفونه، دوه د ار پي جي راكټونه، اته تومانچې، يوه پيکا، درې ٣٠٣ بُر ټوپک، اته لاسي بمونه، دوه مخابرې، د هاوان ٩٠مرمۍ، يو دوربين، څلور سرف موټر او يو شمېر بېلابېلې مرمۍ او چاودېدونکي توکي په کې شامل دي.
