منځپانګې ته تلل
سه‌شنبه ۱۷ نومبر ۲۰۲۶ · کابل ۱۰:۵۱ غ.م
۱۱°صاف · ↑۱۴° ↓۱°د هوا کیفیت: منځنی

د ښوونې او روزنې پوهنتون د نجونو لوبډله د باسکټبال سيالۍ اتله شوه

· ۲ دقیقې لوستل · ۵۹ کتنې

 کابل (پژواک ٢٨ ليندۍ ٩١): د ښوونې او روزنې پوهنتون د باسکټبال لوبډلې د شمشاد ٢٠٢ زون لوبډلې ته په ماتې ورکولو سره د نجونو د باسکټبال سيالۍ د اتلولۍ (اموا) جام خپل کړ.

 د يکشنبې په ورځ دغه لوبې د څلورو لوبډلو په ګډون د شمشاد ٢٠٢ زون په ورزشي تالار کې پيل شوې وې، چې د (ليندۍ په ٢٨ مه) د سې شنبې په ورځ د استاد رباني د ښوونې او روزنې پوهنتون په بريا پاى ته ورسيدې.

 د افغانستان د ورزشکارانو د ملي اتحاديې مشر سيد محمود ضيا دشتي پژواک خبري اژانس ته وويل، چې دغه سيالۍ د نجونو د ورزش د پرمختګ لپاره په لاره اچول شوې وې.

 د هغه په وينا، په دغو سياليو کې د شمشاد ٢٠٢ زون، د استاد رباني د ښوونې او روزنې پوهنتون، اريانا او ميوند لوبدلو شتون درلود، چې په پايله کې يې د استاد رباني د ښوونې او روزنې پوهنتون او د شمشاد ٢٠٢ زون لوبډلې پاى لوبې (فاينل) ته لاره ومونده.  

 دشتي زياته کړه، چې د استاد رباني د ښوونې او روزنې پوهنتون په وروستۍ سيالۍ کې د ٢٦ پر ١٦ له شمشاد ٢٠٢ زون څخه اتلولي تر لاسه کړه.

د ويلو ده، چې په دې سياليو کې د شمشاد ٢٠٢ زون، اريانا او ميوند لوبډلو له دويم مقام څخه تر څلورم  پورې مقامونه خپل کړل.

 په پايله کې د افغانستان د ورزشکارانو ملي اتحاديې په دې سياليو کې ګډون کوونکو لوبډلو ته جايزې او ډالۍ ورکړې.