<p><span style="font-size: 13px">هرات ( پژواک ٢٧ وږى ٩٢) په افغانستان کې د امريکا سفير نن د هرات په ښار کې په ډله ييز ځانمرګي بريد کې د خپلې کونسلګرۍ له زيانمنې شوې ودانۍڅخه ليدنه وکړه.</span></p>
<p>د امريکا سفير جيمز کننګهم د هرات له والي سيد فضل الله وحيدي سره په ګډه خبري ناسته کې د خپلې کونسلګرۍ د بيارغونې او په نږدې ورځو کې د نوي کونسل د کار د پيل خبر ورکړ.</p>
<p>په هرات کې د امريکا کونسلګري، چې د ښار په لوېديځ په پنځه ستوريز هوټل کې موقعيت لري د تېرې جمعې په ورځ په ډله ييز ځانمرګي بريد کې زيانمنه شوه او په پېښه کې شاوخوا ٣٠ تنو ته مرګ ژوبله واوښته.</p>
<p> د امريکا سفير د هغو اتو تنو افغان کارکوونکو په وژل کيدو خواشيني وښوده، چې په کونسلګرۍ کې يې د ملکي قرارداديانو په توګه کار کاوه.</p>
<p> سفير د هرات له والي او هغو افغانو سرتېرو هم مننه وکړه، چې پر کونسلګرۍ د بريد پر مهال يې له نړيوالو ځواکونو سره مرسته کړې وه.</p>
<p>هرات والي سيد فضل الله وحيدي، د امريکا سفير ته د کونسلګرۍ د امنيت ساتنې ډاډ ورکړ او زياته يې کړه، چې پر کونسلګرۍ ډله ييز بريد له هيواده بهر پلان شوى و.</p>
<p>والي زياته کړه، چې په بريد کې وژل شوي ترهګر له جسدونو معلومېده، چې بهرنيان دي، خو نوموړي د کوم هيواد نوم وانه خيست.</p>
<p>په هرات کې د امريکا پر کونسلګرۍ د بريد مسووليت وسله والو طالبانو پر غاړه اخيستى وه.</p>
