کابل ( پژواک ۶ تله ۹۲ ) : په کابل کې د کرکټ ولایتي سیالیو په لړ کې خوست کابل او د ننګرهار ولایت لوبډلې میدان وردګو ته ماتې ورکړه.
دا سیالۍ د تیرې پنجشنبې په ورځ د کابل داحمدشاه بابا مینې دزرملوال کرکټ خصوصي لوبغالي کې پیل شوۍ دي چې پکې د ننګرهار، کونړ، کابل، میدان وردګ، خوست او پکتیا لوبډلو برخه اخیستې ده.
ددې سیالیو یو تن تنظیموونکي حاجي عزیز الله د تلې په ۶مه، پژواک خبري اژانس ته وویل چې نن ددسیالیو په دریمه ورځ هم دوه سیالۍ ترسره شوې.
هغه زیاته کړه چې لوبه د خوست او کابل ترمنځ ترسره شوه، چې د خوست په بریا پای ته ورسیده.
د خوست لوبډلې لومړی بیټنګ وکړ او په ټاکل شویو ۲۰ اورونو کې د لسو لوبغاړو په سوځیدو یې ۱۹۰ منډې جوړې کړ.
د کابل لوبډله یاد هدف ترلاسه نه شو کړای او د اتو لوبغاړو په سوځیدو یې په ۲۰ اورونو کې ۱۷۰ منډې وکړې.
حاجي عزیزالله وایي چې تر غرمې وروسته دویمه لوبه د ننګرهار او میدان وردګو ترمنځ ترسره شوه، چې د ننګرهار په بریا پای ته ورسیده.
د هغه په وینا، ننګرهار لومړی بیټنګ وکړ او په ټاکل شویو ۲۰ اورونو کې د اتو لوبغاړو په سوځیدو یې ۲۱۴ منډې وکړې، شبیر نوري ۷۵ او نجیب ترکي ۶۵ منډې وکړې.
د میدان وردګو لوبډله یاد هدف ترلاسه نه شو کړای او په ۲۰ اورونو کې د اوو لوبغاړو په سوځیدو یې ۱۸۰ منډې وکړې.
د ګروپي سیالیو پای ته رسیدو وروسته د ننګرهار، کونړ، خوست او میدان وردګو لوبډلې نیمه پای لوبې ته لاره پیدا کړه.
سبا لومړۍ نیمه پای لوبه د خوست او میدان وردګو او دویمه د ننګرهار او کونړ لوبډلو ترمنځ ترسره کیږي.
دا سیالۍ د زرملوال خصوصي کرکټ لوبغالي دپرانستې په ویاړ په لاره اچول شوې دي چې د ملي سوداګر حاجي جیلاني زرملوال په خصوصي پانګونې جوړ شوی دی.










