منځپانګې ته تلل
دوشنبه ۱۶ نومبر ۲۰۲۶ · کابل ۲:۰۹ غ.و
۱۴° — په ټولو ولایتونو کې هوا
صاف · ↑۱۴° ↓۰°
د هوا کیفیت: منځنی

د کرکټ د ۱۹ کلنو ملي لوبډلې سکاټلینډ ته ماتې ورکړه

· ۲ دقیقې لوستل · ۴۷ کتنې

کابل (پژواک، ۲۳  سلواغه ٩٢): د افغانستان د کرکټ د ١٩ کلنو ملي لوبډلې د نړيوال جام په یوه تمریناتي لوبه کې د سکاټلینډ لوبډلې ته ماتې ورکړه.

ټاکل شوې ده، چې د ١٩ کلنو لوبډلو د کرکټ نړيوال جام سيالۍ د سلواغې په ۲۵ مه، په متحده عربي اماراتو کې پيل شي، چې پکې د نړۍ ١٦ لوبډلې برخه اخلي.

د نړیوال جام له پیلیدو مخکې یو شمیر تمریناتي لوبې په لاره اچول شوې وې ، چې نن پای ته ورسیدې.

د افغانستان کرکټ بورډ ویاند فرید هوتک د سلواغې په ۲۳مه، پژواک خبري اژانس ته وویل ، چې ددې لوبې پچه سکاټلینډ وګټله او لومړی یې د توپ وهنې پریکړه وکړه.

هغه زیاته کړه، چې د سکاټلینډ ټوله لوبډله په ۴۷ اورونو کې په ۱۶۰ منډو وسوځیدله او افغانستان ته یې د ۱۶۱ منډو هدف کیښود.

د افغانستان له لوري ضیاالرحمن، حشمت الله شهیدي او مسلم موسی دوه، دوه، فرید احمد ملک، سید شیرزاد ، عبدالله عادل او شرف الدین اشرف یو یو لوبغاړی وسوځول.

هوتک وویل ، چې افغانستان یاد هدف په یو څلویښتم اوور کې د اوو لوبغاړو په سوځیدو ترلاسه او لوبه یې وګټله.

دافغانستان له لوري حشمت الله شهیدي ۶۲ ، ناصر احمدزي ۳۲ او وحیدالله شفق ۱۵ منډې جوړې کړې.

وړمه ورځ په یوه بله تمریناتي لوبه کې ویسټ انډیز افغانستان ته ماتې ورکړې وه.

افغانستان به د ۱۹ کلنو په نړيوال جام کې د سلواغې په ٢٦مه، له بنګله دېش سره، په ٢٨مه له اسټراليا او په ٢٩مه له نميبيا سره لوبې ترسره کړي.

د ١٩ کلنو ملي لوبډلې تر دې مخکې هم دوه ځلې په نړيوال جام کې برخه اخيستې وه.