کابل(پژواک٢کب٩٢) : د کابل د امنيه قوماندانۍ پوليس وايي ،چې د سروبي ولسوالۍ د ننني بريد ځانمرګو بريد کوونکو چادرۍ پر سر کړې وې .
د کابل د امنيه قوماندانۍ له مطبوعاتي دفتر څخه پژواک خبري اژانس ته په راليږل شوې خبرپاڼه کې راغلي ، چې په دې پېښه کې يو پوليس وژل شوى او څلور نور ټپيان دي ، خو ملکي وګړو ته مرګ ژوبله نه ده اوښتې .
ويل کيږي ، چې دغه بريد نن سهار شاوخو ٦نيمې بجې هغه مهال پيل شو ، چې يوه ځانمرګي بريد کوونکي د سروبي ولسوالۍ مخې ته له چاودېدونکو توکو ډک موتر ته چاودنه ورکړه او دوه نور بريدکوونکي د ولسوالۍ ودانۍ ته ننوتل .
په خبرپاڼه کې راغلي ، چې ياد شوي دوه بريدکوونکي د ولسوالۍ د ودانۍ دهليز ته ننوتي و او يو ساعت يې له امنيتي ځواکونو سره جګړه وکړه ، چې په پايله کې ووژل شول.
سرچينه وايي،چې اوسمهال سيمه د امنيتي ځواکونو په کنټرول کې ده او د پېښې په اړه څېړنې روانې دي .
له دې مخکې د کابل امنيه قوماندان مل پاسوال محمد ظاهر ويلي و،چې د سروبي ولسوالۍ د امنيه قوماندانۍ پر ودانۍ بريد شوى دى .
د کابل د امنيه قوماندان په وينا، د ياد شوي بريد له امله، چې د کابل -جلال اباد لويه لار د خلکو پرمخ تړل شوې وه ، بېرته پرانيستل شوه.
په سيمه کې د پژواک خبريال وايي ، چې د بريد له امله يو شمير هټۍ زيانمنې شوي، خو تر اوسه خلکو او يا هم سيمه ييزو چارواکو د ماليي زيانونو په اړه څه نه دي ويلي.
د سروبي د روغتون يوې سرچينې پژواک ته وويل، چې له يادې پېښې ورته ٦ ټپيان او يو جسد ور وړل شوي دي.
خوسرچينې د وژل شوي او ټپيانو په اړه نور جزييات ورنکړل .
طالبانو د يادې پېښې مسووليت پر غاړه اخيستى دى.
طالب وياند ذبيح الله مجاهد وايي، چې په دې ډله ييز بريد کې ګڼ شمېر دولتي سرتېرو ته مرګ ژوبله اوښتې ده.
