کندهار (پژواک ٢١ ورى ٩٣): د کندهار ولايت په سپين بولدک ولسوالۍ کې پر بهرنيو ځواکونو د موټر په وسيله ځانمرګى بريد شوى، چې يواځې ځانمرګى په کې وژل شوى او نور چا ته زيان نه دى اوښتى.
دا پېښه نن مازيګر ناوخته د يادې شوې ولسوالۍ بازار ته څېرمه له ښايسته پټرول پمپ سره شوې ده.
د کندهار ولايت د امنيه قوماندانۍ وياند ضيا دراني پژواک خبري اژانس ته وويل، چې د بهرنيو ځواکونو موټريز کتار له سيمې څخه د تېرېدو په حال کې و، چې د يوه فيلډر موټر په وسيله ورباندې ځانمرګى بريد وشو.
هغه زياته کړه، بريد داسې مهال شوى، چې د بهرنيو ځواکونو موټرونه تېر شوي وو، نو ځکه يې چا ته زيان نه دى اړولى.
د نوموړي په وينا، په دې پېښه کې يواځې ځانمرګى او د هغه موټر له منځه تللي دي.
د کورنيو چارو وزارت امنيتي مرستيال محمد ايوب سالنګي په خپلې ټويټر کې ويلي، چې په دې پېښه کې له ځانمرګي پرته بل چاته مرګ ژوبله نه ده اوښتې.
د سيمې يوه دوکاندار سميع الله چې د پېښې ځاى ته نږدې د خوراکي توکو دوکان لري، هم پژواک ته ورته خبره وکړه.
هغه وويل، د ايساف ځواکونو کتار تېر شوى و، چې چاودنه وشوه او دغه مهال په دغه ځاى کې ملکي خلک نه وو، نو ځکه يې چا ته زيان نه دى اړولى.
د يوه بل خبر له مخې، نن تر غرمې مخکې د يادې شوې ولسوالۍ په لکړي سيمه کې پر سرحدي پوليسو د سړک غاړې د ماين چاودنه شوې، چې په کې يو سرحدي پوليس وژل شوى او درې نور ټپيان دي.
په کندهار کې د سرحدي پوليسو د درېيم زون د قوماندانۍ وياند عبدالله ګل پېښه تاييدوي او وايي، سرحدي پوليس د ګزمې په حال کې و، چې د سړک پر څنډه ځاى پر ځاى شوى ماين ورباندې چاودلى، چې په پايله کې يې يو پوليس ووژل شو او درې نور ټپيان دي.
د يادو شوو دواړو پېښو مسووليت وسله والو طالبانو پر غاړه اخيستى دى.
د دغې ډلې وياند قاري يوسف احمدي وايي، چې ځانمرګى بريد د محمد شاکر په نوم د هغوى ملګري کړى، چې په کې يې بهرنيو سرتېرو ته مرګ ژوبله اړولې ده.
هغه دغه راز وايي، چې نن تر غرمې مخکې په شوې چاودنه کې يې د مير حمزه په نوم د سرحدي پوليسو يو قوماندان له خپل يوه ساتونکي سره وژلى دى.
