کابل ( پژواک ٦ غبرګولى٩٣ ):نن د “بابای ملت غوره جام” په نوم د کرکټ د ولايتي سياليو په ترڅ کې د کابل ولايتي لوبډلې د لوګر او د کندهار ولايتي لوبډلې د فارياب لوبډلې ته ماتې ورکړه.
د کرکټ بورډ له خوا په خپره شوې خبرپاڼه کې راغلي، چې د کابل او لوګر ولايتي لوبډلو ترمنځ سيالي د کابل په نړيوال لوبغالي کې ترسره شوه.
د سرچينې د معلوماتو له مخې، د لوبې پچه د لوګر ولايت کپټان وګټله او د توپ اچونې پرېکړه يې وکړه.
په خبرپاڼه کې راغلي،چې د کابل لوبغاړو د لوبې تر ۴۹ اووره د ۲۵۲ منډو هدف ورکړ ، چې له ډلې يې عمران ۷۱، امان ۸۲ او نثار ۴۰ منډې جوړې کړې او د لوګر لوبډلې له لوري سميع ۴ او داوود هم ۴ لوبغاړي وسوځول.
سرچينه ليکي ، چې د لوګر لوبغاړو ونه کړای شول ورکړل شوی هدف بشپړ کړي او د ټولو لوبغاړو په سوځېدو سره د لوبې تر پايه ۱۹۸ منډې جوړې کړې.
د کرکټ بورډ د معلوماتو له مخې، له دې ډلې سميع ۶۱ او داوود ۳۲ منډې وکړې او د کابل توپ اچوونکو له لوري کريم ۲ او انعام ۳ لوبغاړي وسوځول.
په دې سياليو کې امان د لوبې غوره لوبغاړی اعلان شو.
بله سيالي د فارياب او کندهار لوبډلو ترمنځ د کابل په زرملوال په لوبغالي کې ترسره شوه.
سرچينه ليکي، چې د لوبې پچه د کندهار لوبغاړو وګټله او په ټاکل شويو پنځوسو اوورونو کې د څلورو لوبغاړو په سوځېدو سره د ۳۲۵ منډو هدف ورکړ.
په خبرپاڼه کې راغلي، چې د کندهار له لوبغاړو منير ۱۰۲، جمعه ګل ۷۷ او سميع ۷۵ منډې جوړې کړې او د فارياب له لوري عبدالهادي د کندهار درې لوبغاړي وسوځول.
د سرچينې د معلوماتو له مخې، د فارياب لوبډلې ورکړل شوی هدف بشپړ نه کړای شو او د ټولو لوبغاړو په سوځېدو سره د لوبې په ۴۵ اوور کې يې ۲۰۱ منډې جوړې او لوبه يې د کندهار پر وړاندې وبايلله.
کرکټ بورډ ليکي ، چې د کندهار توپ اچوونکو له لوري نوين څلور او ثناءالله دوه لوبغاړي وسوځول.









