لښکرګاه (پژواک١٧زمرى٩٣): باوري سرچينې وايي، چې د هلمند ولايت د سنګين ولسوال په يوه بريد کې ټپي شوى دى.
د ملي اردو يوه باوري تن د نوم نه اخيستو په شرط پژواک خبري اژانس ته وويل، چې تېره شپه وسله والو طالبانو د هلمند د سنګين ولسوالۍ د شکر شيلا په سيمه کې د اردو پر پوستو بريد وکړ.
سرچينه وايې، چې وسله والو طالبانو د ملي اردو پوستي ته تونل وهلى و او له هغې لارې يې پوسته نيولې وه.
سرچينه زياتوي، چې په دغه بريد کې د ملي اردو کنډک مشر جاويد او د سنګين ولسوال سليمان شاه ټپيان شوي دي.
سرچينه وايي، چې دغه لوړپوړي چارواکي هغه مهال ټپيان شول، کله چې دوى يادې سيمې ته د اردو د سرتېرو د مرستې لپاره ورغلل.
ولسوال ته نږدې يوې بلې سرچينې پژواک سره په خبرو کې په ياده نښته کې د ولسوال سليمان شاه ټپي کېدل تاييد کړل.
د وسله والو طالبانو وياند قاري يوسف احمدي پژواک ته وويل، چې دوى په ياده سيمه کې د ملي اردو درې پوستې نيولې دي .
نوموړي ادعا وکړه، چې د بريد پرمهال يې د ملي اردو اته سرتېري وژلي او ١٥ نور يې ټپيان کړي دي.
