منځپانګې ته تلل
سه‌شنبه ۱۷ نومبر ۲۰۲۶ · کابل ۸:۵۰ غ.م
۷°صاف · ↑۱۴° ↓۱°د هوا کیفیت: منځنی

کرکټ: بندامير ښامارانو او مس عينک اتلانو د شپږيزې سياليو پايلوبې ته لار پيدا کړه

· ۲ دقیقې لوستل · ۵۱ کتنې

کابل (پژواک، ٩ وږى ٩٣): په کابل کې د کرکټ شل اوريزو ملي سياليو په لړ کې بندامير ښامارانو او مس عينک اتلانو لوبډلو د سياليو پايلوبې ته لاره پيدا کړه.

د هېواد د پنځو زونونو د لوبـډلو ترمنځ د (شپږيزې) تر نامه لاندې د کرکټ شل اوريزې ملي سيالۍ د کابل په نړيوال لوبغالي کې روانې دي.

د افغانستان کرکټ بورډ وياند فريد هوتک د وږي په نهمه، پژواک خبري اژانس ته وويل چې نن هم دوه لوبې ترسره شوې.

هغه زياته کړه‌، لومړۍ لوبه د بند امير ښامارانو او امو نهنګانو ترمنځ ترسره شوه، چې د بند امير په بريا پاى ته ورسېده.

د دې لوبې پچه د بندامير ښامارانو وګټله او سياله لوبډله يې توپوهنې ته راوبلله.

د ده په وينا، امو نهنګانو په ټاکل شويو شلو اورونو کې د ټولو لوبغاړو په سوځېدو سره ۱۶۰ منډې جوړې کړې، چې له ډلې يې جمعه ګل ۴۰، جاوېد احمدي ۳۵ او ميرويس اشرف ۳۰ منډې جوړې کړې.

د بندامير ښامارانو توپ اچوونکو له لوري يامين احمدزي ۴ او رحمت شاه ۳ لوبغاړي وسوځول.

هوتک وويل، بندامير ښامارانو ورکړل شوی هدف د لوبې په نولسم اور کې د ۴ لوبغاړو په سوځېدو سره بشپړ کړ، چې له ډلې يې حشمت الله شهيدي ۵۴ او حضرت الله ۴۶ منډې جوړې کړې.

د لوبې غوره لوبغاړی يامين احمدزی ونومول شو.

د کرکټ بورډ وياند وايي، دويمه لوبه د مس عينک اتلانو او د بست ساتونکو ترمنځ ترسره شوه، چې د مس عينک اتلانو په بريا پاى ته ورسېده.

هوتک وويل، د دې لوبې پچه د بست ساتونکو لوبډلمشر وګټله او د توپ اچونې پرېکړه يې وکړه.

د مس عينک اتلانو په ټاکل شويو شلو اورونو کې د ۶ لوبغاړو په سوځېدو سره سيالې لوبډلې ته ۱۷۹ منډو هدف ورکړ، چې له ډلې يې نورعلي ځدراڼ ۵۶ منډې جوړې کړې. د بست ساتونکو له خوا نوين الحق د سيالۍ لوبډلې دوه لوبغاړي وسوځول.

د هغه په وينا، د بست ساتونکو ورکړل شوی هدف بشپړ نه کړای شو او د لوبې په وروستي  اور کې يې د ۹ لوبغاړو په سوځېدو سره ۱۵۵ منډې جوړې او لوبه يې د مس عينک اتلانو په ګټه وبايلله.

له دوی څخه سميع اغا ۳۷ او نجيب ځدراڼ ۳۰ منډې جوړې کړې. د مس عينک اتلانو لوبډلې توپ اچوونکو له لوري روښان بارکزي د سيالې لوبډلې ۴ لوبغاړي وسوځول.

روښان بارکزی د لوبې غوره لوبغاړی ونومول شو.

ټاکل شوې، سبا (دوشنبه) د بندامير ښامارانو او مس عينک اتلانو ترمنځ پايلوبه ترسره شي.

محمداصف احمدزى