منځپانګې ته تلل
سه‌شنبه ۱۷ نومبر ۲۰۲۶ · کابل ۸:۳۷ غ.م
۵°نیمه ورېځ · ↑۱۴° ↓۱°د هوا کیفیت: منځنی

کرکټ : دافغانستان ملي نولس کلنې لوبډلې نیپال ته هم ماتې ورکړه

· ۲ دقیقې لوستل · ۸۲ کتنې

کابل ( پژواک، ۲۳ لړم ۹۳ ) : د افغانستان ملي نولس کلنې لوبډلې د اسیا دغوره لیګ سیالیو په لړ کې  خپله څلورمه سیالي د نیپال له ملي نولس کلنې لوبډلې څخه وګټله.

د کرکټ  ددويمې درجې دريځ لرونکو ٦ هېوادونو ترمنځ د يوه ورځني کرکټ د اسيا د غوره ليګ کرکټ سيالۍ د لړم په ١٨مه، په کويټ کې پيل شوې، چې د افغانستان لوبډله هم په کې ګډون لري .

د افغانستان کرکټ بورډ ویاند فرید هوتک دلړم په ۲۳مه، پژواک خبري اژانس ته وویل چې د نننۍ لوبې پچه د ملي نولس کلنو لوبډلې لوبډلمشر وګټله او د نیپال ملي نولس کلنې لوبډلې ته یې د توپوهنې بلنه ورکړه.

هغه زیاته کړه، چې د نیپال ملي نولس کلنو لوبغاړو د سیالۍ تر ۴۵ اوور پورې د ټولو لوبغاړو په سوځیدو سره افغان ملي نولس کلنې لوبډلې ته د ۱۳۵ منډو هدف ورکړ.

 د افغان ملي نولس کلنو لوبغاړو توپ اچونکو له لوري رشید ارمان ۴، ضیاءالرحمن اکبر ۲ او شاهدالله هم د سیالې لوبډلې ۲ لوبغاړي وسوځول.

هوتک وایي، چې افغان ملي نولس کلنې لوبډلې ورکړل شوی هدف د سیالۍ په ۳۶ اوور کې د ۵ لوبغاړو په سوځیدو سره بشپړ کړ چې له ډلې یې شاهدالله ۵۲ په زړه پورې منډې جوړې کړې.

رشید ارمان د سیالۍ غوره لوبغاړی وپیژندل شو.

افغانستان تر دې مخکې ماليزيا، سعودي عربستان او  متحده عربي اماراتو ته هم سترې ماتې ورکړې دي.

په يادو سياليو کې د افغانستان په ګډون د کوربه هېواد کويټ، سعودي عربستان، نيپال ، ماليزيا او د متحده عربي اماراتو د ١٩ کلنو لوبغاړو ملي لوبډلې برخه اخلي.

ملي نولس کلنه لوبډله به خپله وروستۍ سیالي سبا د کویټ ملي نولس کلنې لوبډلې پر وړاندې ترسره کړي.