کلات ( پژواک ٩ لېندۍ ٩٣) : د زابل په شاجوى ولسوالۍ کې د هوان مرمۍ د لګېدو له امله درې ملکي وګړي وژل شوي او پنځه نور ټپيان دي.
د دې ولايت د امنيه قوماندانۍ د امنيت امر سمونوال غلام جيلاني فراهي پژواک خبري اژانس ته وويل ، چې دا پېښه نن ٢ بجې د يادې ولسوالۍ د لالي په کلي کې رامنځ ته شوې ده.
فراهي وويل، چې وسله والو طالبانو په ياد سيمه کې د پوليسو پر پوسته بريد کړى او د بريد په ترڅ کې يې يوه د هوان مرمۍ په کلي کې لګېدلې ده.
هغه د وژل شوو کسانو شمېر درې او د ټپيانو دوه تنه ښيي ، خو د کلات روغتون رييس ډاکټر لعل محد پژواک ته وويل ، چې له يادې پېښې درې مړي او پنځه ټپيان ور وړل شوي.
ده وويل چې د پېښې په قربانيانو کې ماشومان هم شته او د ټپيان روغتيايي وضعيت د اندېښنې وړ نه دى.
د لالي د کلي اوسېدونکي نعمت الله وويل، چې د هوان مرمۍ د کلي جومات خواته لګېدلې او ياده مرګ ژوبله يې اړولې ده.
هغه وويل، ښايي دا مرمۍ د سيمه ييزو پوليسو له لوري توغول شوې وي ، خو د امنيت امر وايي چې په ياده ولسوالۍ کې سيمه ييز پوليس هوان نه لري.
وسله والو طالبانو تراوسه په دې تړاو رسنيو ته څه نه دي ويلي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن