مهترلام کې چاودنې يو پوليس او درې ملکي وګړي ووژل

<p>مهترلام (پژواک، ٩ سلواغه ٩٣): د لغمان ولايت په مرکز مهترلام ښار کې د يوې چاودنې له امله يو پوليس او درې ملکي وګړي وژل شوي دي.</p>

<p>د لغمان د والي وياند سرحدي ځواک د سلواغې په ٩مه پژواک خبري اژانس ته وويل چې دا چاودنه نن سهار شاوخوا اته نيمې بجې د ولايت د مرکز مهترلام اړوند د مصري کلا په سيمه کې شوې ده.</p>

<p>هغه زياته کړه چې چاودېدونکي توکي د سړک پر غاړه ځاى پر ځاى شوي وو او د پوليسو پر يوه موټر چاودېدلي دي.</p>

<p>ځواک وايي چې په دې چاودنه کې يو پوليس او درې ملکي وګړي وژل شوي دي.</p>

<p>دى وايي چې پوليس په سيمه کې د دې چاودنې په اړه څېړنې پيل کړې او په تور يې يو شکمن تن نيولى دى.</p>

<p>د لغمان سرپرست والي ډاکتر فضل الله مجددي دغه چاودنه غندلې ده.</p>

<p>وسله والو مخالفينو تر اوسه د دې چاودنې په اړه څه نه دي ويلي.</p>