منځپانګې ته تلل
سه‌شنبه ۱۷ نومبر ۲۰۲۶ · کابل ۷:۰۰ غ.م
۱° — په ټولو ولایتونو کې هوا
نیمه ورېځ · ↑۱۴° ↓۱°
د هوا کیفیت: منځنی

اماراتو ته د کرکټ لوبغاړو د ويزو ستونزه هواره شوه

· ۱ دقیقه لوستل · ۷۲ کتنې

کابل (پژواک، ٢٦ لېندۍ ٩٤): د افغانستان کرکټ بورډ وايي چې متحده عربي اماراتو ته د افغان لوبغاړو د ويزې ستونزه هواره شوې او ډېر ژر به پاتې لوبغاړي له ملي لوبډلې سره يو ځاى شي.

د افغانستان کرکټ بورډ وياند فريد هوتک د لېندۍ په ٢٦مه پژواک خبري اژانس ته وويل چې د کرکټ بورډ د هلو ځلو او د حکومت په همکارۍ په متحده عربي اماراتو کې د افغان لوبغاړو د ويزو ستونزه هواره شوې ده.

د ملي لوبـډلې د لوبغاړو نبي عيسى خېل، دولت ځدراڼ او نجيب الله ځدراڼ د ويزو د ستونزو له امله ونه شو کولى چې تېره مياشت د پي اېن جي هېواد پر وړاندې  د انټرکانټنينټال کپ سياليو لوبه کې برخه واخلي.

افغانستان په دې لوبه کې پي اېن جي ته ستره ماتې ورکړې وه.

خو د افغانستان کرکټ بورډ وياند فريد هوتک وويل چې د يادو لوبغاړو د ويزو ستونزه هواره شوې، دوى ته ويزې ترلاسه شوې او ډېر ژر به د اماراتو پر لور روان شي.

ټاکل شوې چې د متحده عربي اماراتو په شارجې ښار کې د مرغومي له ٤مې څخه د افغانستان او زمبابوى کرکټ لوبـډلو تر منځ د يو ورځنيو او شل اووريزو کرکټ سيالو  لړۍ پيل شي.

د  افغانستان ملي لوبډله لاد مخه د تمريناتو لپاره په شارجه کې ده.