منځپانګې ته تلل
سه‌شنبه ۱۷ نومبر ۲۰۲۶ · کابل ۶:۳۰ غ.م
۱° — په ټولو ولایتونو کې هوا
نیمه ورېځ · ↑۱۴° ↓۱°
د هوا کیفیت: منځنی

لسګونو بامياني ځوانانو نشه يي توکو ته د “نه” ويلو سيالي ترسره کړه

· ۲ دقیقې لوستل · ۷۰ کتنې

باميان (پژواک، ٣١ غبرګولى ٩٥): د باميانو لسګونه ځوانانو چې نجونې هم په کې وې، د نشه يي توکو له زيانونو څخه د پوهاوي په موخه نشه يي توکو ته د (نه) ويلو په نوم د بايسکل ځغلونې سيالي ترسره کړه.

د باميانو له نشه يي توکو سره د مبارزې مشر حسين اقا نظري پژواک خبري اژانس ته وويل چې په دې سيالۍ کې ٣٠ ورزشکارو نجونو او هلکانو برخه اخيستې وه چې شاوخوا ٣ کيلومتره فاصله يې ووهله او د سيالۍ په پاى کې طاهرې د نجونو د برخې او علي انصاري د هلکانو د برخې لومړي مقامونه خپل کړل.

هغه زياته کړه چې له نشه يي توکو سره د مبارزې کمپاين نن  له نشه يي توکو سره د مبارزې د نړيوالې ورځې په مناسبت په دغه ولايت کې پيل شوى دى.

د باميانو ورزشي امر حسين علي کريمي وويل چې دا سيالي يې د نشه يي توکو پر وړاندې د کمپاين په موخه پيل کړې او هيله ده چې دا ډول خوځښتونه د دې لامل شي چې ځوانان د نشه يي توکو پر ځاى ورزش ته مخه کړي.

د باميانو ولايت ورزشي امر ورزش سلامتيا او نشه يي توکي تباه کوونکي وبلل او زياته يې کړه: ((په همدې سبب بايد يې نشه يي توکو ته د (نه) کمپاين پيل کړي او ځوانان بايد ورزښ خپل الګو کړي.))

د سيالۍ يوې ګټونکې طاهرې پژواک ته وويل چې سيالي د امام صادق له کتابتونه پيل او د باميانو تر امنيې قوماندانۍ پورې ورسېده چې شاوخوا ٣٠ نجونو او هلکانو په کې ګډون کړى و او ٣ کيلومتره فاصله يې ووهله.

هغې زياته کړه: ((هيله لرو چې ټول ځوانان زموږ په څېر ورزش ته مخه کړي او د نشه يي توکو له کارونې لاس واخلي.))

د باميانو له نشه يي توکو سره د مبارزې رياست د معلوماتو پر بنسټ، اوسمهال په دې ولايت کې د نشه يي توکو څه باندې ٥٠  زره روږدي شتون لري.