مهترلام (پژواک، ٣٠زمرى ٩٦) : د څه پاسه ٤٢ ميليونه افغانيو په لګښت د لغمان پوهنتون د انجنیري پوهنځي د تدریسي ودانۍ د جوړيدو چارې پيل شوې.
په دې اړه د زمري په ٣٠مه په جوړو شويو مراسمو کې د پوهنتون ګڼ شمېر استادانو، محلصینو، مشرانو او ځوانانو ګډون کړی وو .
د لغمان والي عبدالجبار نعيمي پژواک اژانس ته وويل چې دغه ودانۍ د څه باندې د دوه څلوېښت ميليونه افغانيو په لګښت په پاخه او اساسي ډول جوړيږي .
هغه وويل چې دغه ودانۍ به ١٩درسي خونې، ١٠ اداري خونې او دوه تالارونه ولري چې په ټولو اسانتياوو به سمبال وي .
هغه زياته کړه چې دغه پروژه د لوړو زده کړو وزارت په چوکاټ کې د نړيوال بانک له خوا تمويل او جوړيږي چې د يوه کال په موده کې به يې د جوړېدو چارې بشپړې شي.
ده وويل چې دا ډول پروژې ولس او ځوان نسل ته ښه زيرى ورکوي او له دې سره به افغانستان د پوهې او قلم پرمټ پر ځان بسيا شي.
والي د داسې پروژو د پلي کولو او بشپړولو په چارو کې د امنيت په برخه کې د ولس همکاري اړينه وبلله او له هغوى يې په دې برخه کې د مرستې غوښتنه وکړه.
د يادونې ده چې نن د دغه ولايت چارواکو په لغمان کې د يو ميليارد او درې سوه ميليونو افغانيو په لګښت د ٢٤ پروژو چې تر کار لاندې دي خبر ورکړى و .
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن