ګردېز (پژواک ٩ سلواغه ۹۸): د ۱۳۹۹ مالي کال په ملي بودجه کې پکتيا ولايت ته يوازې ۳۱۳ ميليونه افغانۍ بودجه او دوه کوچنۍ نوې پروژې ورکړل شوې دي.
د پکتيا د ولايتي شورا غړي او اوسېدونکي دا د دغه ولايت پر وړاندې ناوړه او تبعيضي چلند بولي او وايي چې د پکتيا ستونزو او اړتياوو ته په کتو يادې پيسې پر نشت حساب دي.
د ولايتي شورا غړی تاج محمد منګل د سلواغې په نهمه په اړه پژواک خبري اژانس ته وويل چې د کمزوري مديريت، سرپرستې کابينې او د تدارکاتو د اوږدې پروسې له امله د تېر کال ځينې مستردې او په سږنۍ بودجه کې کابو ټولې پخوانۍ پروژې ځای شوې دي.
منګل پژواک ته وويل: ((د پکتيا نفوس، اړتياوو او ستونزو ته په کتو د مور، ميرې او تبعيضي چلند شوی دی. نوې پروژې يوازې يو کوچنی پُل او يو ۶۰۰ متره استنادي دېوال دی، نورې ټولې د ۱۳۹۸ کال پروژې دي او هغه بودجه چې په ۹۸ کال نيول شوې وه، بيا تکراري ده. پکتيا اشد ضرورتونه لري، خو هېڅ په پام کې نه دي نيول شوي.))
د يادې شورا بل غړی ممتاز کرخېل هم په ملي بودجه کې پکتيا ته ورکړل شوې ونډه د شرم وړ بولي او وايي چې په دې پيسو آن يوه پروژه هم نه شي ترسره کېدای.
کرخېل زياته کړه: ((په ملي شورا کې د پکتيا د استازو د بې اتفاقي او د ماليې وزارت د توپيري چلند سبب دا شو چې پکتيا ته د خندا وړ انکشافي بودجه ورکړل شي. که ضرورتونه او د پکتيا محروميت وګورو، دا درې سوه ميليونه افغانۍپه هېڅ حساب دي، په دې باندې حتی يو سړک هم نه جوړېږي.))
مدني فعال او د ځوانانو پارلمان غړی احمدالله احمدي وايي چې د پکتيا اوسېدونکو په هره ملي مسئله کې قربانې ورکړې، خو برعکس د دولت له خوا هر وخت په مهمو مسايلو او امتيازاتو کې ګوښه شوې ده.
احمدي وايي: ((پکتيا د زون مرکز او لومړی درجه ولايت دی، د دغه ولايت سختو ستونزو او جدي اړتياوو ته په کتو بايد حداقل پنځوس فيصده ستونزو او اړتياوو ته د ځواب ويلو پلان وای، خو دا ۳۰۰ ميليونه افغانۍ د پکتيا په شان د پراخې جغرافيې او زيات نفوس ته هېڅ هم نه دي.))
خو په ولسي جرګه کې د پکتيا استازي بيا وايي چې په ملي بودجه کې يې ګڼې نوې پروژې ځای کړې او دوی ته د قناعت وړ ده.
په ولسي جرګه کې د پکتيا استازي يار باز حميدي پژواک ته وويل چې پکتيا ته ورکړل شوې پروژې د قناعت وړ او کمې نه دي.
حميدي وويل: ((پکتيا ته کافي پروژې ورکړل شوې دي، په دې کې سړکونه، پلونه، د مکتبونو تعميرونه او ورته نورې مهمې پروژې شاملې دي. نوې پروژې هم په کې شته دي.))
د يادو څرګندونو په اړه د پکتيا والي شميم خان کټوازی بيا وايي چې په ملي بودجه کې پروژې او اړوند نور مسايل په کافي اندازه نه دي تشريح او زياتوي چې له يادې بودجې پرته به په دغه ولايت کې په ډېر لګښت ځينې پروژې پلې شي.
کټوازي زياته کړه: ((ملي بودجه او بودجوي مسايل په سم ډول نه دي تشرېح شوي، موږ له ملي بودجې پرته زياتې پيسې او پروژې لرو. د بېلابېلو ادارو لخوا به د سلګونه ميليونه افغانيو په لګښت پروژې پلې شي.))
د يادونې ده، په ملي بودجه کې پکتيا ته له ځانګړې شوې ۳۱۳ ميليونه پراختيايي بودجې ۲۰۰ ميليونه افغانۍ د ځاځی اريوب ــ ازرې ولسوالي سړک، ۷۸ ميليونه افغانۍ د مچلغو بند ډيزاين او نهه ميليونه د څښلو اوبو رسولو پروژې، ۱۹ ميليونه افغانۍ د پکتيا پوهنتون ځينو اړتياوو، دوه ميليونه افغانۍ دوه نويو پروژو او ۵ ميليونه افغانۍ عامه کتابتون او د مهارتونو د مرکز پراختيا ته ځانګړې شوې دي.
غړيYou need to subscribe to view the full article. Please login or register a new account.
