کابل (پژواک، ۱۵ لېندۍ ٩٩): د افغانستان د روڼتيا څار اداره وايي چې د کونړ په نورګل ولسوالۍ کې د ټولنيز څار رضاکارانو په همکارۍ د يوه کلينیک په ترميم کې د فساد مخه نيول شوې او نيمګړې چارې يې بشپړې شوې دي.
د افغانستان لپاره د ملګرو ملتونو پراختیايي پروګرام (UNDP) په ملاتړ په دې وروستیو کې د افغانستان د روڼتيا څار ادارې له خوا د کونړ د شلو هغو روغتیایي مرکزونو چې خدمات په ټیټ کیفیت وړاندې کېدل او ګڼې ستونزې په کې موجودې وې، د ټولنیز څار پروګرام له خوا یې څار ترسره شوی دی.
په یادو روغتیايي مرکزونو کې د درملو کمښت، د ډاکترانو پر وخت دندې ته نه حاضرېدل، د شخصي اړیکو پالل، له ناروغانو سره د ډاکترانو ناسم چلند او د مناسب پاک چاپېریال نه شتون هغه ستونزې او ننګونې وې چې د خدماتو کیفیت یې خراب کړی و، نو دې ته په کتو د ډنمارک سفارت په مالي مرسته له فساد سره د مبارزې او روڼتیا د عمل پروژې په پلې کېدو سره په یادو مرکزونو کې د یاد فساد او ستونزو مخه نیول شوې ده.
په کونړ کې د ټولنیز څار پروګرام غړي صداقت الله غورځنک پژواک ته وویل: “کله چې په یادو روغتیايي مرکزونو کې د ټولنیز څار پروګرام د رضاکارانو له لوري پلی شو، اوس وضعیت په کې د ښه کېدو په حال کې دی، ګڼې هغه ستونزې چې پخوا موجودې وې، د مسوولینو پام ور اوښتی او اوس تر ډېره هوارې شوې دي.”
د نورګل ولسوالۍ د کرچندو کلینیک:
د روڼتيا څار ادارې وویل، د کونړ د نورګل ولسوالۍ مرکزي کلینیک چې ودانۍ یې بیارغونې ته اړتیا درلوده، د دې ولسوالۍ په مزار دره سیمه کې چې د طالبانو تر کنټرول لاندې ده، موقعیت لري.
دغه اداره زیاتوي چې د دغه کلینیک ودانۍ د خرابوالي ستونزه د ټولنیز څار پروګرام رضاکار څو ځلې له اړوند مسوولینو سره شریکه کړه، خو پاملرنه ورته ونه شوه او دغه کار لامل شو چې یاده ودانۍ نوره هم خرابه شي.
د سرچينې په وينا، دا چې دغه کلينیک د طالبانو په ساحه کې دی، نو حکومت نه شو کولای څار یې وکړي چې بالاخره دا ستونزه د اېس اېم جي په غونډه کې ياده شوه.
یاده اداره وايي: “کله چې دا موضوع راپورته شوه، نو معلومه شوه چې د کلینیک چت د بیاترمیم پیسې مخکې د دولت له بودجې ايستل شوې وې، قراردادي خپلې پیسې اخیستې وې او کار یې نیمګړی پرېیښې و.”
د روڼتيا څار ادارې له خوا په ادې اړه د معلوماتو له خپرېدو وروسته، دغه موضوع په ټولنیزو رسنیو کې هم کښته پورته شوه چې له امله یې د کونړ ولایتي اداره له سختو نیوکو سره مخ شوه.
سرچينې ويلي چې وروسته قراردادي د ولايتي مسوولينو له خوا ور وغوښتل شو او ساحې ته د یوه ټېم له لېږلو وروسته یې د کلینیک د چت ترمیم چارې بېرته پیل کړې.
د روڼتيا څار ادارې په خبره چې دغه قراردادي له حکومته د نورګل ولسوالۍ د کلینیک د چت ترمیم پیسې پخوا ایستلې او حیف میل کړې وې خو د ټولنیز څار د رضاکار په همکاري یې دغه ستونزه را وسپړله او قراردادي یې دې ته اړ کړ چې دغه پروژه بشپړه کړي.
یاده اداره وايي چې د قراردادي له خوا د یاد کلينیک د ترميم پروژه اوس بشپړه او یاده ستونزه هواره شوې ده.
خو د روڼتیا څار ادارې ویلي چې له دغه کلینیکه د څار پر مهال له ځینو ستونزو سره هم مخ وو.
د دې ادارې په وینا: “د څار په لومړۍ ورځ د یاد کلینیک مسوولینو له رضاکار سره ناسم چلند کاوه؛ هغه یې نه پرېښود چې له کلینیکه ټولنیز څار وکړي، خو بیا د ټولنیز څار پروګرام له مشر او ولایتي ادارې سره له همغږۍ وروسته دغه ستونزه هواره شوه.”
د دې ادارې اجرائیوي رییس سید اکرام افضلي وايي، که چېرې خلک په خپلو سیمو کې له روغتیايي مرکزو څارنه ونه کړي، نو فساد کوونکي به همداسې فساد ترسره کوي.
د نورګل ولسوالۍ ولسوال محمد حنیف خیرخواه پژواک ته وویل چې د دې ولسوالۍ په یوه غرنۍ کرچندو سیمه کې د یوه کلنیک د ترمیم چارې چې یو څه ترسره شوې وې او بیا د نامعالوم علت له امله درېدلې وې، اوس د کلنییک د پاتې کار چارې د قراردادي له خوا بشړې شوې او کلنییک د خلکو د روغتیايي خدماتو لپاره چمتو شوی دی.
د کونړ د عامې روغتیا ريیس ډاکتر عزیزالرحمن هم تایید کړه چې د نورګل ولسوالۍ د کرچندو کلینیک چې په یوه ناامنه سیمه کې دی، د ترمیم چارې يې د قراردادي له خوا د قرارداد مطابق بشپړ شوی او اوس په کې هېڅ ستونزه نشته.
