پلخمري (پژواک، ١٩ لېندۍ ٩٩): په ولسي جرګه کې د بغلان استازي او د مدني تولنې غړي وايي چې په دې وروستيو کې د شمال ولايتونو لويې لارې ناامنه شوې او خلک يې سخت اندېښمن کړي دي.
دوى دغه څرګندونې د بغلان د نوي والي محمد اکبر بارکزي د معرفۍ په غونده کې وکړې.
په یاده غونډه کې په ولسي جرګه کې د بغلان استازي اسدالله شهباز وويل چې په دې وروستيو کې د شمال ولايتونو په لارو کې يو شمېر پوستې سقوط شوې خو بېرته نه دي رغول شوې.
دى وايي: ((د همدې پوستو د سقوط له امله لويې لارې نا امنه شوې، خلکو ته يې اندېښنې پيدا کړې چې بايد بېرته ترميم شي.))
د شهباز په وينا، دغه ناامني تر ډېره د بغلان ولايت په مربوطاتو کې ده چې بايد د مخنيوي لپاره يې جدي هلې ځلې وشي.
ده زياته کړه: ((که په بغلان کې د لویو لارو امنیت خوندي نه شي، خلک او د ولسوالیو دولتي مامورین به د ولایت له مقام سره د حکومتولۍ په برخه کې د همکارۍ د دوام توان له لاسه ورکړي.))
دغه راز د بغلان د مدني ټولنو مسوول محمد رسول هبا هم د دغه ولايت د لويو لارو ترڅنګ د ولسواليو امنيتي وضعيت د اندېښنې وړ وباله.
دى وايي: ((په ولسواليو کې ډېرې سيمې د دولت له واکه وتلې دي، په کومو سيمو چې واک لري، هلته د فساد او د ځمکو غصب روان دى.))
ده له نوي والي نه غوښتنه وکړه چې د لويو لارو او ولسواليو د امنيت ټينګښت لپاره جدي هلې ځلې وکړي.
يو شمېر نورو کسانو هم ورته څرګندونې وکړې.
د غونډې په پاى کې د بغلان نوي والي محمد اکبر بارکزي وويل چې د لويو لارو او ولسواليو امنيت ته به ځانګړې پاملرنه کوي.
هغه وويل: ((د امنيتي وضعيت په اړه له اړوندو پوځي ادارو سره خبرې کوو، منظم امنيتي پلان جوړوو او لومړيتوبونه ورته ټاکو.))
بارکزی زياتوي چې د اداري فساد، غاصبينو او زورواکو پر وړاندې جدي مبارزه کوي.
هغه له وسله والو طالبانو د سولې غوښتنه وکړه او خلکو ته يې ډاډ ورکړ چې افغانستان ته سوله راتلونکې ده.
د يادونې ده، محمد اکبر بارکزي له مخکې د معادن او پټروليم د وزير په توګه دنده ترسره کړې ده.
Visits: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن