کابل (پژواک، ٢٥ ليندۍ ٩٩) : د امریکا د انتخاباتي یا اليکټورال کالج غړیو په رسمي توګه ولسمشريزو ټاکنو کې د دیموکراټ ګوند د کاندید جوبایډن کامیابي تايید کړه.
د امريکا ولسمشريزې ټاکنې چې د تېرې نومبر مياشتې په ٣ مه ترسره شوې وې، په لومړنيو غير رسمي پايلو کې جوبايډن ګټونکى اعلان شوى و، خو ولسمشر ډونالډ ټرمپ خپله ماتې نه منله او په ټاکنو کې يې د درغليو تورونه پورې کول.
د امريکا د ټاکنو د قوانينوله مخې هر کانديد چې له ٥٣٨ اليکټورال کالج رايو څخه ٢٧٠ رايې وګټي، د ولسمشر په توګه ټاکل کېږي.
د دې قوانينو له مخې، امريکايي رايه ورکوونکي نېغ په نېغه ولسمشر ته رايه نه ورکوي، بلکې په هر ولايت کې د اړوندو ګوندونو له خوا ټاکل شويو ځانګړو کسانو ته رايه ورکوي چې ګټونکي ته يې اليکټورال کالج وايي.
د امريکا غږ د راپور له مخې، پرون د الکټورال کالج ٥٣٨ غړو، د خپل هېواد په بېلا بېلو برخو کې رایې واچولې چې له مخې يې جوبايډن ٣٠٦ او ډونالډ ټرمپ ٢٣٢ رايې وګتلې.
د انتخاباتي کالج د غړیو تر رايې اچونې وروسته منتخب ولسمشر جوبایډن خپل ملت ته په وينا کې وويل، چې یو ځل بیا د قانون حاکمیت، اساسي قانون او د خلکو ارادې وګټله.
هغه زياته کړه : ” زموږ دیموکراسي وګواښل شوه، وازمایل شوه خو ثابته شوه چې دا دیموکراسي قوي او رښتینې ده.”
بلخوا ولسمشر ټرمپ يو ځل بيا په ټاکنو کې د درغليو تورونه پورې کړي او پلويانو يې په يو شمېر ښارونو کې له تاوتريخوالي ډک لاريونونه کړي دي.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن