کابل (پژواک، ٢۶ لېندۍ ٩٩): د افغانستان د بهرنيو چارو وزارت وايي چې پاکستان ته د ملا برادر په مشرۍ د طالبانو پلاوي سفر له دوى سره په مشوره ترسره کېږي.
د بهرنيو چارو وزارت له خوا د لېندۍ په ٢٧مه پژواک اژانس ته په رالېږل شوې خبرپاڼه کې راغلي چې دوى له دغه سفره خبر دي.
سرچينې زياته کړې، اسلام اباد ته د طالب پلاوي سفر د افغانستان له اسلامي جمهوري دولت سره په مشوره او کابل ته د پاکستان د لومړي وزير عمران خان د سفر په پايله کې ترسره شوى.
په خبرپاڼه کې راغلي چې پاکستان غواړي د افغانستان سولې پروسه کې همکاري وکړي او افغانستان د پاکستان له دې هڅو ستاينه کوي.
د بهرنيو چارو وزارت ويلي، د افغانستان دولت د خپلو خلکو رښتینې هيلې د پاکستان له دولت سره شريکې کړې او د تاوتريخوالي پر کمولو، اوربند او د مذاکراتو له لارې سولې ته پر رسېدو ټينګار کوي.
په خبرپاڼه کې راغلي، کابل هيله لري چې اسلام اباد ته د طالبانو پلاوي سفر به يادو موخو ته د رسېدو لپاره ګټور تمام شي.
سرچينې زياته کړې، د افغانستان اسلامي جمهوري دولت د افغان سولې په تړاو د پاکستان دولت هڅو ته په درنه سترګه ګوري.
د يادونې ده، د ملا برادر په مشرۍ د طالبانو د قطر دفتر يو نهه کسيز پلاوى نن سهار اسلام اباد ته رسېدلى دى.
ټاکل شوې ده، دغه پلاوى به د درې ورځني سفر پر مهال د پاکستان له لومړي وزير عمران خان او د بهرنيو چارو له وزير شاه محمود قريشي سره وګوري.
بايد وويل شي چې د طالبانو يو پلاوى څو مياشتې مخکې هم اسلام اباد ته په سفر تللى و.
Visits: 7
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن