کابل (پژواک، ٦ سلواغه ٩٩) : د اندونيزيا د ولسمشر پخواني مرستياال او د دغه هېواد د محمديه علماوو شورا مشر په قطر کې د افغانستان دولت له مرکچي پلاوي سره ليدلي دي.
د افغانستان د مذاکراتي ټيم له خوا د سلواغې په ٦مه، پژواک اژانس ته په يوه را استول شوې خبرپاڼه کې راغلي چې په دغې ليدنه کې د مذاکرهکوونکي پلاوي ريیس محمد معصوم ستانکزي، د سولې په چارو کې د دولت وزیر او د مذاکرهکوونکي پلاوي غړي سید سعادت منصور نادري، د مذاکرهکوونکي پلاوي نورو غړو محمد ناطقي، شریفې زرمتۍ وردګ او باتور دوستم شامل وو.
سرچينې زياته کړې، په دې لیدنه کې د محمدیه علماوو سازمان ريیس وویل چې په یوه اسلامي ټولنه کې د تاوتریخوالي دوام د سولې بهیر تر پوښتنې لاندې راولي.
هغه زياته کړه، تمه کېږي چې دواړه مذاکرهکوونکي لوري به د اوربند په کولو سره او د رغندو مذاکراتو له لارې سوله او امنیت ټينګ کړي.
په خبرپاڼه کې راغلي، د افغانستان اسلامي جمهوریت د مذاکرهکوونکي پلاوي ريیس محمد معصوم ستا
نکزي هم د کالا د خبرو هرکلی وکړ او ویې ویل چې اوربند او اغېزناک مذاکرات د افغانستان اسلامي جمهوریت د پلاوي یو لومړیتوب دی.
ستانکزي د سولې په مذاکراتو کې د اندونیزیا د رغنده رول مننه وکړه او د افغانستان د سولې بهیر په ملاتړ کې یې د دوی د همکاریو دوام وغوښت.
دغه راز د اندونيزيا د علماوو شورا رييس دوکتور يوسف کلا وړمه ورځ په قطر کې د طالبانو د سياسي دفتر مشر ملا برادر اخند، د مذاکراتی ټیم مشر شیخ مولوي عبدالحکیم حقاني او ورسره پلاوي سره وليدل.
د طالبانو د قطر دفتر وياند ډاکټر نعيم وايي، په دې ليدنه کې د بین الافغانی مذاکراتو پر روان وضعیت او د دوحې توافق نامې د پوره تطبیق په اړوندو موضوعاتو خبرې وشوې .
سرچينې زياته کړې، یوسف کالا د روانو بین الافغانی مذاکراتو پروسې د کامیابۍ هیله وکړه او په دې اړه يې د هر ډول مرستې چمتووالی وښود.
ملا برادر اخوند له یوسف کالا څخه د مننې کولو ترڅنګ وويل : “موږ په هېواد کې د سولې د تامین په موخه مرستو ته اړتيا لرو په ځانګړي ډول د مسلمانو هېوادونو مرستو ته او هر کلی یی کوو. ”
د يادونې ده چې د اندونيزيا د محمديه علماوو مشر دوکتور يوسف کلا تر دې مخکې کابل ته هم راغلى و، چې له ولسمشر اشرف غني او نورو مشرانو سره يې د سولې پروسې په اړه خبرې کړې وې.
Views: 171
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن