جلال اباد (پژواک ۹ سلواغه ۹۹): د ننګرهار د هسکې مېنې جودرې جومات چې د يوه ځانمرګي بريد پرمهال ويجاړ شوی و، جوړ او نن پرانیستل شو.
د دغه جومات د رغونې په چارو ۱۳ ميليونه افغانۍ لګښت راغلی دی.
دغه پېښه شاوخوا کال وړاندې د جمعې د لمانځه پرمهال رامنځته شوې وه چې ۷۳ ځايي اوسېدونکي په کې وژل شوي وو.
دغه جومات د سلواغې په ۹مه دغې سيمې ته د ننګرهار د والي د خپل سفر پر مهال پرانيست.
د ننګرهار والي ضياءالحق امرخېل وويل، دغه جومات په ۴۷۰ متر مربع ځمکه کې جوړ شوی، چې د ننګرهار يو له لويو جوماتونو څخه شمېرل کيږي.
هغه زياته کړه، یاد جومات د سيلابونو ګواښ څخه د ژغورلو په موخه د ۷۳ متره په اوږدوالي او دري متره په پلنوالي استنادي دېوال جوړ شوی او لاندې فرش ساحه يې ټول کانکریټ نيول شوې ده.
دی وايي، دغه جومات د درې متره په پلنوالي او شپاړس متره په اوږدوالي داخل کې يو منار او يوه بسوه ځمکه کې ګنبد لري.
د ننګرهار والي وويل، د جومات محراب او دروازې د کونړ له لرګي څخه جوړ شوي، همدا راز ملا امام ته ځانګړې خونې، تشنابونه او د احاطې ديوال هم په قرارداد کې شامل دي، چې ډېر ژر به يې چارې بشپړې شي.
د سيمې خلکو د دغه جومات په رغېدو خوښي وښوده، خو غوښتته يې وکړه چې دوی ته ډېر يتيمان او کونډې ورپاتې دي چې بايد لاس نيوی يې وشي.
د سبحان په نوم يو ځايي اوسېدونکی وايي، د دغه کلي خلک له ډېرو نورو ستونزو سره مخامخ دي.
Visits: 69
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن