کابل (پژواک، ٦ ورى ١٤٠٠) : په افغانستان کې د سویډن کمېټې ادارې د ښکلا ځدراڼ په نوم د خپلې يوې افغانې کارکوونکې دنده پر ټويټر د یوه پوسټ له امله ځنډولې ده.
د سویډن کمېټې له خوا په يوه خپره شوې خبرپاڼه کې راغلي چې ښکلا ځدراڼ د تېرې شنبې په ورځ د مارچ په ٢٠مه، په خپله ټويټرپاڼه کې د غير مسوولو وسله والو د قوماندان عليپور پر ضد پوسټ کړى و.
خبرپاڼې د ښکلا ځدراڼ د پوسټ يوه برخه هم خپره کړې چې په کې راغلي : ((عليپور او د هغه کسان دې بايد زرترزره ووژل شي. دوی هغه ترهګر او یاغیان دي چې د بهرنیو استخباراتو له خوا تمويليږي. ))
ښکلا ځدراڼ دا پوسټ وروسته له هغه کړی چې د ميدان وردګو په بهسودو ولسوالۍ کې د عليپور د وسله والو له خوا يوه حکومتي چورلکه ووېشتل شوه، چې د څلورو پيلوټانو په ګډون نهه سرتېري په کې ووژل شول.
په افغانستان کې د سویډن کمېتې د ښکلا ځدراڼ له دندې څخه د لرې کولو په اړه سپيناوى ورکړى دى.
په خبرپاڼه کې راغلي : (( د عليپور او د هغه د کسانو د وژلو غږ د سویډن کمېټې استازیتوب نه کوي او نه هم موږ د عليپور او د هغه د ځواکونو له خوا د ترسره کېدونکي تاوتریخوالي ملاتړ کوو.))
سرچينې زياته کړې، ښکلا ځدراڼ خپل شخصي نظر په خپله شخصي ټویټرپانه ليکلی او د هغې خبرې د سویډن د کمېټې استازیتوب نه کوي.
په خبرپاڼه کې راغلي : (( هغه د دې حق لري چې خپل شخصي نظریات بیان کړي او د سویډن کمېټه د بیان آزادۍ ته درناوى لري. که څه هم د هغې څرګندونې د علیپور او د هغه د کسانو د ” فوري وژنې” په اړه زموږ د اساسي ارزښتونو او بشري حقونو د اصولو پر خلاف دي. په همدې خاطر د سویډن کمېټې د ښکلا ځدراڼ دنده د داخلي څېړنو تر پای ته رسېدو پورې ځنډولې ده.))
په خبرپاڼه کې راغلي، هرڅوک چې د تاوتریخوالې په ترسره کولو تورنیږي د عادلانه محاکمې حق لري. د سویډن کمېټې کارکوونکي بايد د قانون له حاکمیت څخه وړاندې ولاړ نه شي.
ښکلا ځدراڼ بیا په خپل ټويټر کې ليکلي چې د سوېډن کمېټې له خوا له دندې لرې شوې ده.
هغې زياته کړې، چې په ټويټر کې يې خپل شخصي نظر خپور کړى او هر څوک د دې حق لري چې خپل حق خپور کړي، د دې نظر د ادارې استازيتوب نه کوي.
د سوېډن کمېټې دغه پرېکړه د خلکو له ګنو غبرګونونو سره مخ شوې ده.
عبدالله زرمتي په خپله فيسبوک پاڼه کې ليکلي، د يو فرد په توګه د ښکلا ځدراڼ حق دی چې د ظلم، جبر او بې عدالتۍ پر وړاندې خپل نظر وړاندې کړي، دا چې تاسو د څو مغرضو کسانو په خوله د نوموړې دنده ځنډولې دا ستاسو اداره تر سوال لاندې راولي.
د نذير سهار په نوم بل تن ليکلي، د ښکلا ځدراڼ د دندې ځنډول غير عادلانه پرېکړہ دہ. له كاركوونكو بايد د هغوى د فردي ازادۍ حق وانخیستل شي. همدومره كافي وه چې وویل شي دا د نوموړې شخصي نظر دى.
زبير بابکرخېل د سويډين کمېټې د پرېکړې پر ضد ليکلي : که پر خپل اختيار مو د هغې دنده ځنډولې وي نو له دغه اقدامه مخکې له اداري اصولو سره سم، توصيه پکاره ده او که مو د يو شمېر افغانانو د غوښتنې په اساس دغه کار کړى وي نو غواړئ چې له هغې څو چنده زيات خلک درڅخه د دغې بې عدالتۍ پوښتنه وکړي؟
Visits: 3793
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن