<p style="text-align: justify;">کابل (پژواک، ۱۸ غویی ۱۴۰۰) : ولسمشر اشرف غني د کابل د دشت برچي چاودنې په غبرګون کې ویلي، چې طالبان د قدر په شپو کې هم د بې ګناه هیوادوالو له وژلو لاس وانخیست.</p>
<p style="text-align: justify;">له ارک څخه د غویي په ۱۸مه، په یوه خپره شوې خبرپاڼه کې راغلي، طالبانو د خپلو جنایتونو په دوام نن مازیګر د کابل ښار دشت برچي سیمه کې د سیدالشهدا نجونو ښوونځي په دروازه کې د برید په ترسره کولو سره یو شمېر زده کوونکو ته چې نوي یې درسونه پای ته رسولي وو، مرګ ژوبله اړولې ده.</p>
<p style="text-align: justify;">د کورنیو چارو وزارت ویلي چې په دې برید کې تر ۳۰ زیات کسان وژل شوي او تر ۵۰ زیات ټپیان دي.</p>
<p style="text-align: justify;">خو یوې بلې امنیتي سرچینې پژواک ته وویل چې په دې چاودنه کې تر ۵۰ زیات کسان وژل شوي او تر ۱۰۰ زیات ټپیان دي.</p>
<p style="text-align: justify;">سرچینې زیاته کړې، ولسمشر اشرف غني د دغه عمل د سخت غندلو پر مهال وویل، طالبانو خپل نامشروع جنګ ته په شدت ورکولو او تاوتریخوالي زیاتولو سره یو ځل بیا وښوده چې نه یوازې د اوسني بحران د سوله ییز او اساسي حل اراده نه لري، بلکې د وضعیت په پېچلي کولو سره د سولې لپاره برابر شوی فرصت سبوتاژ کوي.</p>
<p style="text-align: justify;">هغه د طالبانو دغه کړنه بشري جنایت او د اسلامي ارزښتونو ضد عمل وباله وې ویل، د طالبانو ډلې آن د قدر په شپو کې چې د قران عظیم الشان د نزول شپه ده، د بېګناه وطنوالو له وژلو لاس وانخیست.</p>
<p style="text-align: justify;">د ولسمشر په وینا، دغه ډله چې د هیواد له امنیتي او دفاعي ځواکونو سره د جنګ په ډګر کې د مقابلې توان نه لري، په بې رحمانه توګه عام المنفعه ځایونه او د نجونو ښوونځي هدف ګرځوي.</p>
<p style="text-align: justify;">هغه د هیواد امنیتي او دفاعي ځواکونو ته لارښوونه وکړه، چې د طالبانو دا ډول کړنې بې ځوابه پرېنږدي.</p>
<p style="text-align: justify;">خو د طالبانو ویاند ذبیح الله ویاند په یوه ټویټ کې دا برید غندلی او ادعا یې کړې ده، چې پکې لاس نه لري. هغه ویلي، چې دا برید دداعش ډلې کړی.</p>
