کابل (پژواک، ۳۰ غبرګولی ۱۴۰۰): د تخار، لوګر، سمنګان، کندوز او جوزجان ولایتونو سیمه ییزې سرچینې وايي چې طالبانو په تېرو ۲۴ ساعتونو کې د هزار سُمچ، چال، خواجه غار او ینګي کلا، چهاربولک، خروار، دره صوف بالا، دشت ارچي، فیض اباد او خانقاه ولسوالۍ نیولې دي.
د تخار امنیتي سرچینې: څلور ولسوالۍ طالبانو ونیوې
په تخار کې یوې امنیتي سرچینې نن پژواک ته وویل چې وسله والو طالبانو په تېرو ۲۴ ساعتونو کې د دغه ولایت هزار سمچ، چال، خواجه غار او ینګي کلا ولسوالۍ نیولې دي.
سرچینې زیاته کړې: ((یادې ولسوالۍ له تېرو څو ورځو راهیسې له جدي خطر سره مخ وې چې په تېره یوه شپه ورځ کې د طالبانو له خوا ونیول شوې.))
خو د تخار د والي ویاند حامد مبارز پژواک ته وویل چې تر اوسه یادې ولسوالۍ نه دي سقوط شوې او سخته جګړه په کې روانه ده.
د طالبانو ویاند ذبيح الله مجاهد ویلي چې په تېرو ۲۴ ساعتونو کې یې د تخار ولایت نمک اب، چال، بنګي کلا، خواجه غار او هزار سمج ولسوالۍ نیولې دي.
د بلخ چهاربولک ولسوالي
د بلخ سیمه ییزې سرچینې مني چې د دغه ولایت چهاربولک ولسوالۍ له ۴۸ ساعته کلابندۍ وروسته طالبانو نیولې ده.
په دې ولسوالۍ کې د حاجي شاه محمد په نوم قومي مشر پژواک ته وویل، د ولسوالۍ او امنیې قوماندانۍ ودانۍ له جګړې پرته طالبانو نیولې، لسګونه سرتېري طالبانو ته تسلیم شوي دي.
په ورته وخت کې د چهاربولک ولسوال عطامحمد شرفیار تایید کړه چې یو شمېر سرتېري طالبانو ته تسلیم شوي خو د طالبانو له خوا د ولسوالۍ د نیولو په اړه یې څه ونه ویل.
طالبانو په یوه خبرپاڼه کې ادعا کړې چې د دې ولسوالۍ له سقوط وروسته ډېر شمېر امنیتي سرتېري له خپلو وسلو سره یو ځای طالبانو ته تسلیم شوي دي.
د لوګر ولایت د خروار ولسوالۍ د سقوط خبر هم ورکړل شوی
په لوګر کې امنیتي سرچینې پژواک خبري اژانس ته وویل چې طالبانو تېره شپه د دغه ولایت خروار ولسوالۍ تر خپل بشپړ کنټرول لاندې راوستلې ده.
خو د لوګر د والي ویاند دیدار لونګ وايي چې د ځینو امنیتي ملحوظاتو له امله د خروار ولسوالۍ مرکز درې کاله مخکې د دغه ولایت مرکز پل علم ښار ته انتقال شوی و.
هغه زیاته کړه: ((یوازې د خواجه انګور سیمه کې څلور کوچني امنیتي مرکزونه مېشت وو چې یاد مرکزونه نوي ځای ته لېږدول شوي دي.))
د طالبانو ویاند ذبيح الله مجاهد وايي چې خراور ولسوالۍ د دوی کسانو نیولې ده.
د سمنګان دره صوف ولسوالۍ سقوط
سمنګان ولایت کې سیمه ییزې سرچینې تاییدوي چې د دغه ولایت دره صوف بالا ولسوالۍ د یکشنبې پر سهار طالبانو نیولې ده.
د سمنګان د ولایتي شورا مرستیال هاشم سروري وویل، د امنیتي ځواکونو او طالبانو ترمنځ له تېرې شنبې شپې راهیسې جګړه روانه وه او د یکشبنې پر سهار دغه ولسوالۍ د طالبانو له خوا سقوط شوې ده.
په ورته وخت کې د سمنګان د امنیې قوماندانۍ مطبوعاتي مسوول منیر رحیمي هم ومنله چې دولتي ځواکونه د یادې ولسوالي له مرکزه وتلي او د زیرکي په نوم سیمې ته یې شاتګ کړی دی.
د طالبانو ویاند هم ادعا کړې چې دره صوف بالا ولسوالۍ یې نیولې ده.
د کندوز دشت ارچي ولسوالي طالبانو نیولې ده
کندوز کې یوې امنیتي سرچینې پژواک ته وویل، نن ماسپین دوه بجې وسله والو طالبانو له مقاومت پرته دشت ارچي ولسوالۍ نیولې ده.
د دشت ارچي ولسوالۍ اوسېدونکي اخترمحمد ویلي چې طالبانو دغه ولسوالۍ په بشپړ ډول نیولې ده.
طالبان هم د دې ولسوالۍ سقوط تاییدوي.
د فاریاب ولایت مرکز میمنه ښار د سقوط له خطر سره مخ دی
د فاریاب سیمه ییزې سرچینې وايي چې د دغه ولایت د پنځو ولسوالیو (المار، قیصار، خواجه سبزپوش، شیرین تګاب او دولت اباد) له سقوط وروسته اوس میمنه ښار د سقوط له خطر سره مخ دی.
د فاریاب ولایتي شورا غړي محمد نادر سعیدي وویل، تېره شپه د لومړۍ لوا د درېیم کنډک (المار ولسوالۍ کې د ودلت یوازینۍ نظامي مرکز) پرسونل له خپلو ټولو جنګي تجهیزاتو، په قیصار ولسوالۍ کې د څلورم کنډک مرکز له تجهیزاتو، د پښتونکوټ ولسوالۍ په عرب اقسا سیمه کې شپږ پوستې او مرکز، د دهندرې په ابګردان کې د عامه ساتنې کنډک سیمه او په خواجه موسی سیمه کې څو پوستې د حکومت له خوا د طالبانو په واک کې ورکړل شوې او اوس د میمنې ښار د سقوط له خطر سره مخ دی.
د فاریاب د پولیسو مطبوعاتي مسوول عبدالکریم یورش بیا د دغه ولایت اوسېدونکو ته ډاډ ورکوي چې د میمنې ښار به هيڅکله سقوط ونه کړي.
نوموړي وویل، امنیتي او دفاعي ځواکونو لازم تدابیر نیولي، د ښار ورودي دروازې ټینګې شوې، سلګونه کومانډو میمنې ښار ته د رسېدو په حال کې دي.
د جوزجان ولایت فیض اباد او خانقا ولسوالۍ طالبانو نیولې
سیمه ییزې سرچینې مني چې د دولتي ځواکونو او طالبانو ترمنځ د سختو نښتو په ترڅ کې د دغه ولایت فیض اباد او خانقا ولسوالۍ طالبانو نیولې دي.
په ولسي جرګه کې د جوزجان د خلکو استازې حلیمې صدف کریمي پژواک ته تایید کړه چې یادې ولسوالۍ نن له ماسپښین وروسته طالبانو نیولې دي.
په ورته وخت کې په جوزجان کې د ملي امنیت ریاست باوري سرچینې پژواک ته ویلي چې یادې دوه ولسوالۍ د حکومت له کنټروله وتلې او په ځینو نورو ولسوالیو کې د طالبانو او دولتي سرتېرو ترمنځ سختې جګړې روانې دي.
دا په داسې حال کې ده چې تېره ورځ (د غبرګولي ۲۹مه) د فراه، سمنګان او فاریاب ولایتونو سیمه ییز سرچینو منلې وه چې په تېرو ۲۴ ساعتونو کې پشت کوه، اناردره، شېرین تګاب، دره صوف پایین او بهارک ولسوالۍ طالبانو نیولې دي.
د یادونې ده، د هېواد یو شمېر نورو ولایتونو کې د جګړو له امله نږدې ۶۰ ولسوالۍ طالبانو نیولې دي.
Visits: 35
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن